NDI-ის კვლევაში რესპონდენტებმა საქართველოს პრემიერმინისტრის ბიძინა ივანიშვილის საქმიანობა სხვადასხვა სფეროს მიხედვითაც შეაფასეს.
12 ივლისს NDI-იმ უკვე წარმოადგინა საზოგადოებრივი აზრის კვლევის ნაწილი, რომელშიც მოსახლეობამ ყველაზე მნიშვნელოვან ეროვნულ საკითხთა შორის პირველ ადგილზე სამუშაო ადგილები დაასახელა (61%). სამუშაო ადგილების კუთხით პრემიერ ივანიშვილის საქმიანობას დადებითად მოსახლეობის მხოლოდ 13% აფასებს, უარყოფითად კი 32%.
გასულ კვირას გამოქვეყნებული მონაცემების თანახმად, მეორე ადგილზე მოსახლეობამ პრიორიტეტულ სფეროდ ტერიტორიული მთლიანობა (34%) მიიჩნია. ამ სფეროში ივანიშვილის საქმიანობას საერთო ჯამში დადებითად 18% აფასებს, უარყოფითად კი 23%.
პრიორიტეტულ სფეროებს შორის მესამე ადგილზე რესპონდენტთა 30% ხელმისაწვდომ სამედიცინო მომსახურებას ასახელებს. ჯანდაცვის სფეროში პრემიერმინისტრის საქმიანობას დადებითად 30% აფასებს, უარყოფითად - 10%. მიმდინარე წლის მარტთან შედარებით ივანიშვილის საქმიანობას ამ კუთხით უფრო ნაკლები ადამიანი იწონებს. მაშინ კარგად და ძალიან კარგად პრემიერს საქმიანობას 39% აფასებდა, ცუდად და ძალიან ცუდად კი - 6%.
მეოთხე ადგილზე მნიშვნელოვან ეროვნულ საკითხთა შორის მოსახლეობამ სიღარიბე დაასახელა (26%). ამ კუთხით პრემიერის საქმიანობას დადებითად 14% აფასებს, უარყოფითად -25%.
მარტთან შედარებით, პრემიერის საქმიანობის დადებითად შეფასებამ უმნიშვნელოდ მოიმატა მხოლოდ 2 სფეროში - სოფლის მეურნეობა და განათლება.
სოფლის მეურნეობის თვალსაზრისით ბიძინა ივანიშვილის საქმიანობას საერთო ჯამში 39% აფასებს კარგად ან ძალიან კარგად (მარტში 39%), განათლების კუთხით კი - 35% (მარტში 28%).
NDI-ის კვლევა 2013 წლის ივნისში ჩატარდა და მის ფარგლებში 2,338 რესპონდენტი მთელი საქართველოს მასშტაბით პირისპირ ინტერვიუს მეთოდით გამოიკითხა. NDI-ის კვლევებს აფინანსებს შვედეთის საერთაშორისო განვითარებისა და თანამშრომლობის სააგენტო (Sida) და ატარებს კავკასიის კვლევითი რესურსების ცენტრი CRRC.
