ჟურნალისტი გიორგი ფარესიშვილი პრემიერმინისტრის მრჩეველს, გია ხუხაშვილს, შინაგან საქმეთა მინისტრის მოადგილეს, გელა ხვედელიძესა და მთავარი პროკურორის მოადგილეს, ლაშა ნაცვლიშვილს, მათ წინააღმდეგ მასალების გამოქვეყნებით ემუქრება. ფარესიშვილი რამდენიმე დღის წინ გავრცელებულ პირადი ცხოვრების ამსახველ ვიდეომასალას ფაბრიკაციას უწოდებს, რომელსაც მანამ არ გამოიძიებენ, სანამ ხუხაშვილი, ხვედელიძე და ნაცვლიშვილი თანამდებობებს ინარჩუნებენ, რადგან მის წინააღმდეგ ბინძური კამპანია სწორედ ამ სამ ადამიანთან დაპირისპირებას მოჰყვა. ფარესიშვილი ამბობს, რომ პროკურატურაში დაკითხვისას გამომძიებლებმა მის ჩვენებაში არ ჩაწერეს ბრალდება ხუხაშვილის, ნაცვლიშვილისა და ხვედელიძისადმი.
ფარესიშვილი აცხადებს, რომ ის გამოძიებას გადასცემს მის ხელთ არსებულ დოკუმენტაციასა და აუდიომასალას დაინტერესების შემთხვევაში და თუ ხსენებულ პირებს თანამდებობებს არ დაატოვებინებენ, მაშინ ყველაფერს გაასაჯაროებს. ფარესიშვილის განცხადებით, ეს მასალები ამ სამი ადამიანის ბრალეულობას ადასტურებს. მისი თქმით, მასალები ეხება ხვედელიძის პერსონას, ხვედელიძისა და სანიკიძის ურთიერთობას და ასევე მის მიერ ლაფანყურის საქმეში გია ლორთქიფანიძეზე ხელის დაფარებასაც. მისივე თქმით, აუდიომასალებში შედის ხუხაშვილისა და კვერცხების თემაც. ფარესაშვილი ასევე აცხადებს, რომ დოკუმენტებში მოხსენიებულია ფინანსთა მინისტრი ნოდარ ხადურიც.
"მივმართავ ამ სამ პიროვნებას, არსებობს თქვენ მიერ ჩადენილი ბინძური ქმედებების ფაქტები. არსებობენ ბიზნესმენები, რომლებიც დაასახელებენ ხუხაშვილისა და ნაცვლიშვილის დანაშაულებებს", - აცხადებს ფარესიშვილი.
ფარესიშვილის თქმით, უშუალოდ მასსა და გელა ხვედელიძეს შორის დაპირისპირება მას შემდეგ დაიწყო, რაც ორივე ქართულ ოცნებაში იყვნენ და მან ხვედელიძე ვანო მერაბიშვილთან თანამშრომლობაში და ქართული ოცნების "ნაციონალებით" დაკომპლექტებაში ამხილა. როგორც ფარესიშვილი ამბობს, უკრაინიდან დაბრუნების შემდეგ, მის ხელში აღმოჩნდა ინფორმაცია ამ პირების ქმედებებზე. მათ კი ორი არჩევანი ჰქონდათ - მისი ლიკვიდაცია, ან სიბინძურის დადება.
"ნაციონალური მოძრაობა დაღუპა იმან, რომ ხელს აფარებდნენ თავიანთ თანაგუნდელებს და ახლა იგივეს აკეთებს ქართული ოცნება. ნაციონალურ მოძრაობას რომ ნდომოდა, ამ სიბინძურეს კარგა ხნის წინ გამოაქვეყნებდნენ, ამას გააკეთებდნენ თუნდაც არჩევნების დროს და რადგან მე ვიყავი ქართული ოცნების აქტიური წევრი, ეს მათ რეიტინგზე ძალიან ცუდად იმოქმედებდა", – განაცხადა ფარესიშვილმა.
ფარესიშვილის თქმით, ის შეხვდა აშშ-ის ელჩს საქართველოში, რიჩარდ ნორლანდს, რომელსაც საათ-ნახევრის განმავლობაში ესაუბრა გავრცელებულ ვიდეოჩანაწერთან დაკავშირებით მიმდინარე გამოძიებაზე. მისი თქმით, ელჩი ნორლანდი დაინტერესებულია ამ საქმის გამოძიებით.
