საპარლამენტო უმრავლესობის წარმომადგენელი, კობა დავითაშვილი, შინაგან საქმეთა მინისტრს ირაკლი ღარიბაშვილს შენიშვნას აძლევს და შერჩევით სამართლიანობაში ადანაშაულებს. ამის შესახებ განცხადება, ნეტგაზეთის ცნობით, მან პარლამენტში გააკეთა ჟურნალისტებთან საუბრისას.
"მე მაქვს შინაგან საქმეთა მინისტრთან შენიშვნები გუშინდელ აქციასთან დაკავშირებით. არ მაქვს შენიშვნები სამართალდამცავების ქმედებაზე. ისინი საკუთარ მოვალეობას ასრულებდნენ, მაგრამ მე მინდა ვკითხო შინაგან საქმეთა მინისტრ ბატონ ღარიბაშვილს. გუშინ ჩატარდა ორი აქცია, ერთი აქცია ჩატარდა პარლამენტის წინ "ნაციონალური მოძრაობის" მიერ, მეორე აქცია ჩატარდა თბილისში "ლაბორატოორია 1918-ის" მიერ. ორივე აქციაზე დაირღვა კანონი. პირველ შემთხვევაში, ოცმეტრიანი დისტანცია არ იყო დაცული პარლამენტიდან, რაც კანონის მოთხოვნაა. მეორე შემთხვევაში წინასწარი გაფრთხილება არ მოხდა გზის გადაკეტვის თაობაზე. ორივე კანონდარღვევაა. მინდა ვიკითხო, რატომ არის შერჩევითი სამართალი "ნაციონალური წევრების" სასარგებლოდ? რატომ არ იქნა აღკვეთილი მათი მხრიდან კანონის დარღვევა და რატომ იქნა აღკვეთილი "ლაბორატორია 1918-ის მიერ კანონის დარღვევა?"- აცხადებს დავითაშვილი.