საქართველოს უშიშროების საბჭოს მდივანი გიგა ბოკერია იუსტიციის მინისტრის განცხადებებს ეხმაურება. მისი თქმით, მინისტრ თეა წულუკიანის მიერ, პრეზიდენტ სააკაშვილის შესაძლო დაკითხვაზე საუბარი "უპასუხისმგებლობა" და "პოლიტიკური ბოდვაა". ბოკერიას თქმით, ამ განცხადებებს სხვა შეფასება არ მოეძებნება.
"ქალბატონი წულუკიანისგან ჩვენ მოვისმინეთ მორიგი, ოღონდ ამჯერად მსხვილი კალიბრის უპასუხისმგებლო და ჩვენი ქვეყნის ნაციონალური ინტერესების საწინააღმდეგო განცხადებები. ერთადერთი შეფასება, რაც მომდის თავში, არის ის, რომ ეს არის პოლიტიკური ბოდვა. სხვა შეფასება, სამწუხაროდ, არ არსებობს", - აღნიშნა ბოკერიამ.
ბოკერია წულუკიანის მიერ ახალ ID ბარათებთან დაკავშირებით გაკეთებულ განცხადებასაც გამოეხმაურა. მისი თქმით, იგივე შეფასება ვრცელდება ბარათებთან დაკავშირებითაც.
"ეს სამოქალაქო სახელმწიფოს ფუნდამენტური პრინიციპების საწინააღმდეგო განცხადება იყო", - თქვა ბოკერიამ.
წულუკიანმა განაცხადა, რომ წინა ხელისუფლება ID ბარათების ჩიპზე დამატებითი ინფორმაციის შენახვას გეგმავდა, რის დამადასტურებელ ვიდეომასალასაც ის უახლოეს მომავალში გამოაქვეყნებს. მინისტრმა ასევე აღნიშნა, რომ მიმართავს წმინდა სინოდს იმის დასადგენად, თუ რამდენად შეესაბამება რელიგიურ დოგმებს ინფორმაცია, რაც ამჟამად ჩიპზე ინახება. წულუკიანი აცხადებს, რომ აღნიშნულთან დაკავშირებით საკუთარი პოზიციიის დაფიქსირება რელიგიური უმცირესობების წარმომადგენლებსაც შეეძლებათ და საბოლოო გადაწყვეტილება, სავარაუდოდ, ზაფხულისთვის იქნება მიღებული.
"მომავალ დღეებში მივმართავ წმინდა სინოდს და მისგან მოვითხოვ რელიგიურ შეფასებას ამ მონაცემების შესახებ. მინდა მათგან მოვისმინო კვალიფიციური აზრი, რამდენად შეიძლება მონაცემთა ეს ნუსხა ეწინააღმდეგებოდეს რელიგიურ დოგმებს და მართლმადიდებლურ რწმენას. ასევე, იგივე შეკითხვით მინდა მივმართო რელიგიურ უმცირესობებს. მას შემდეგ, რაც იქნება მიღებული პასუხი, შეგვეძლება ზაფხულისთვის ამ ბარათებთან დაკავშირებით საბოლოო გადაწყვეტილების მიღება", - აღნიშნა წულუკიანმა.
