თბილისის მთავრობის წევრებმა, ქალაქის მერისთვის ბრალის წაყენებასთან დაკავშირებით სპეციალური განცხადება გაავრცელეს.
როგორც განცხადებაშია აღნიშნული, მერისთვის წარდგენილი ბრალდება უსაფუძვლოა.
"ჩვენ, ქალაქ თბილისის მთავრობის წევრები, ვაცხადებთ, რომ დედაქალაქის მერთან ერთად ვიღებთ პასუხისიმგებლობას თბილისში განხორციელებულ ყველა პროექტზე, ამ წლების განმავლობაში მიღწეულ უამრავ წარმატებებსა თუ დაშვებულ შეცდომებზე. ამასთან ერთად, დარწმუნებულები ვართ, რომ დედაქალაქის მერისთვის წარდგენილი ბრალდება, რომელიც რიყის ტერიტორიაზე სკვერის მოწყობასა და დასუფთავების კომპანიაში მოქალაქეების დასაქმებას შეეხება, არის უსაფუძვლო და საგამოძიებო ორგანოების მოქმედება მხოლოდ ქალაქის მერის პოლიტიკური პოზიციის პასუხს წარმოადგენს. ვიმედოვნებთ, რომ სასამართლოზე საკითხის განხილვისას დამტკიცდება სიმართლე და ჩვენ თბილისის მერის, გიგი უგულავას ხელმძღვანელობით გავაგრძელებთ მუშაობას ქალაქისა და თბილისელების სასარგებლოდ", - ნათქვამია განცხადებაში.
შეგახსენებთ, როგორც გუშინ გახდა ცნობილი, ფინანსთა სამინისტროს საგამოძიებო სამსახური, ქალაქ თბილისის მერს, დღეს ბრალს წაუყენებს. ბრალდება შეეხება დიდი ოდენობით საბიუჯეტო თანხების მითვისებას, გაფლანგვასა და დიდი ოდენობის უკანონო შემოსავლების ლეგალიზაციის და ფულის გათეთრების ფაქტებს.