ერთიანი ნაციონალური მოძრაობა საქართველოს საგარეო კურსის უცვლელობის შესახებ კანონპროექტის ინიციატივით გამოდის. სამი კომპონენტისგან შემდგარი კანონპროექტი პარტიის ოფისში ვიცესპიკერმა გიორგი ბარამიძემ წარადგინა.
მისი განმარტებით, ბოლო დღეების განმავლობაში აქტუალური გახდა ქვეყნის დსთ-ში გაწევრიანებაზე მოლაპარაკებების დაწყება, რომელზეც რუსეთის საგარეო უწყების ოფიციალური პირები საუბრობენ.
საპარლამენტო უმცირესობა იმედოვნებს, 3-კომპონენტიან კანონპროექტს საპარლამენტო უმრავლესობაც მხარს დაუჭერს.
"კანონპროექტის პირველი კომპონენტია NATO-სა და ევროკავშირში საქართველოს გაწევრიანების კურსის უცვლელობა, რათა არცერთმა მთავრობამ არ გადაუხვიოს ამ გზას და შეიქმნას საკანონმდებლო გარანტიები კურსის უცვლელობის შესახებ, მეორეა - საქართველოს დეოკუპაციისა და ოკუპირებული ტერიტორიების არაღიარების პოლიტიკა, რომელიც ასევე სასიცოცხლო მნიშვნელობისაა ჩვენი ქვეყნისთვის და მესამეა - არ გაწევრიანდეს საქართველო დსთ-ში, ევრაზიულ კავშირში, კოლექტიური უსაფრთხოების შესახებ ხელშეკრულების ორგანიზაციაში, საბაჟო კავშირში და სხვა გაერთიანებებში, სადაც ოკუპანტი ძალა არის წამყვანი და რომლებშიც გაწევრიანება საფრთხეს უქმნის საქართველოს სუვერენიტეტს", - აღნიშნა გიორგი ბარამიძემ.
