საქართველოს სტატისტიკის ეროვნულმა ბიურომ პირდაპირი უცხოური ინვესტიციების წინასწარი მონაცემები გამოაქვეყნა. საქსტატის მიხედვით, 2012 წლის მესამე კვარტალში 195.4 მილიონი აშშ დოლარი შემოვიდა. წინა კვარტალთან შედარებით, ინვესტიციებმა 10.9%-ით დაიკლო. წინა წლის ანალოგიურ პერიოდთან შედარებით კი, ქვეყანაში 38.3%-ით ნაკლები ინვესტიცია შემოვიდა.
საქართველოში განხორციელებული ინვესტიციების მხრივ ლიდერობს ნიდერლანდები. აქ დარეგისტრირებული კომპანიების წილმა 25% ანუ 49.2 მილიონი აშშ დოლარი შეადგინა. მას მოსდევს თურქეთი - 32.7 მილიონი აშშ დოლარით.
ეკონომიკური დარგების მიხედვით, ყველაზე მეტი ინვესტიცია საფინანსო სექტორში ჩაიდო - 46.1 მილიონი აშშ დოლარი. მას მოსდევს ენერგეტიკა - 40.2 მილიონი აშშ დოლარით.
წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2012 წლის პირველი ცხრა თვის მანძილზე 684.2 მილიონი აშშ დოლარი შეადგინა. წინა წლის ანალოგიურ პერიოდთან შედარებით, ინვესტიციების მოცულობამ 11.7%-ით დაიკლო.
