უკრაინის პრეზიდენტი ვოლოდიმირ ზელენსკი სოციალურ ქსელში წერს, რომ უკრაინის საგარეო დაზვერვის სამსახურმა მოიპოვა ახალი რუსული დოკუმენტები, რომლებიც აფასებენ ქვეყნის მიერ ომის შედეგად მიღებულ დანაკარგებს.
"მნიშვნელოვანია, რომ ეს არის უშუალოდ რუსეთის შიდა შეფასება - რომლის დამალვასაც ისინი ცდილობენ როგორც მსოფლიოსგან, ასევე საკუთარი შიდა აუდიტორიისგან," - წერს ზელენსკი.
ზელენსკის თქმით, რუსეთს მოუწია ნავთობის ჭაბურღილების შემცირება. მისი თქმით, ერთ-ერთი რუსული ნავთობკომპანია იძულებული გახდა დაახლოებით 400 ჭაბურღილი დაეხურა.
"რუსული ნავთობის წარმოების სპეციფიკის გათვალისწინებით, ეს მნიშვნელოვანი დანაკარგებია, რადგან რუსეთში ჭაბურღილების ხელახლა გახსნა გაცილებით რთულია, ვიდრე სხვა ნავთობმწარმოებელ ქვეყნებში," - აღნიშნავს ზელენსკი.
მისივე თქმით, რუსეთს მხოლოდ წელს ნავთობის გადამუშავების მინიმუმ 10%-ით შემცირება მოუწია.
"ჩვენ ვხედავთ, რომ ჩვენი უკრაინული გრძელვადიანი სანქციები ნამდვილად ეფექტურია და ჩვენ გავაგრძელებთ ჩვენი აქტიური ქმედებების ამ ხაზის გაფართოებას," - განაცხადა უკრაინის პრეზიდენტმა.
ზელენსკის თქმით, 11 ფინანსური ინსტიტუტი ემზადება სრული ლიკვიდაციისთვის იმ პრობლემების გამო, "რომელთა მოგვარება სხვა საშუალებებით შეუძლებელია," ხოლო კიდევ რვა ბანკს დაუგროვდა კრიტიკული პრობლემები, რომელთა მოგვარებაც მხოლოდ გარე რესურსების მოხმარებით იქნებოდა შესაძლებელი.
უკრაინის პრეზიდენტი ასევე წერს წლევანდელი ფედერალური ბიუჯეტის დეფიციტის მაჩვენებლებიც "იმედისმომცემად", რომელიც მაისის მონაცემებით თითქმის 80 მილიარდ დოლარს შეადგენს.
"მე ასევე დავავალე უკრაინის საგარეო დაზვერვის სამსახურის უფროსს, ოლეჰ ლუხოვსკის, რომ ისეთი ფორმატით, რომელიც არ დააზარალებს ჩვენს წყაროებს, გაუზიაროს მიღებული ინფორმაცია რუსეთის მიერ ფინანსური სირთულეების მოგვარებაში გლობალური კომპანიების ჩართვისა და სანქციებისგან თავის არიდების სქემებში მონაწილეობის მცდელობების შესახებ," - წერს ზელენსკი.
მან ასევე აღნიშნა, რომ არსებობდა რუსეთის მიერ ოკუპირებული ტერიტორიიდან მარცვლეულის ექსპორტის ორგანიზების მცდელობები, რომლებზეც უკრაინა "პარტნიორებს შეატყობინებს."
"ჩვენ დავაფიქსირეთ ყირიმის დროებით ოკუპირებული ტერიტორიიდან მარცვლეულის ექსპორტის ორგანიზების მცდელობები - და, სამწუხაროდ, ნახევარკუნძულის ეკონომიკური ექსპლუატაციის სხვა ფორმები, რომლებშიც მონაწილეობენ აშშ-ს სუბიექტები. ჩვენ ვაცნობებთ ჩვენს პარტნიორებს. ჩვენ ასევე ვადევნებთ თვალს მცდელობებს, რომ დემოკრატიული ქვეყნებიდან ინვესტიციები და ტექნოლოგიები შემოვიტანოთ რუსეთის არქტიკულ ნავთობისა და გაზის პროექტებში," - აღნიშნავს უკრაინის პრეზიდენტი.
