ევროკომისიის სპიკერმა 10 ოქტომბერს განაცხადა, რომ ევროკომისია სამუშაო ჯგუფს შექმნის, რათა გამოიძიოს ბრალდებები, რომ უნგრეთი ევროპულ ინსტიტუტებს უთვალთვალებდა.
ბრალდებები მას შემდეგ წამოაყენეს, რაც გამოქვეყნდა უნგრული არაკომერციული ჟურნალისტური საგამოძიებო ჯგუფ Direk36-ის, ბელგიური გაზეთ De Tijd-ისა და გერმანული ჟურნალ Der Spiegel-ის ერთობლივი გამოძიება.
"ევროკომისია სერიოზულად უდგება ყველა იმ ბრალდებას, რომელთა მიხედვითაც უნგრეთის დაზვერვის სამსახურის ჯაშუშური ოპერაციები მიმართული იყო ევროკავშირისა და მისი თანამშრომლების წინააღმდეგ." - განაცხადა ევროკომისიის სპიკერმა.
ევროკავშირში, ბრიუსელში, უნგრეთის მუდმივი წარმომადგენლობის სპიკერმა განაცხადა, რომ ევროპარლამენტის ერთ-ერთმა წევრმა უნგრეთის საგარეო საქმეთა მინისტრს, პეტერ სიიარტოს 10 ოქტომბერს კომიტეტის სხდომაზე ბრალდებებთან დაკავშირებით შეკითხვა დაუსვა.
"მე არაფერი ვიცი რაიმე პროცედურის შესახებ, რომელიც ამ ე.წ. საგამოძიებო პორტალებს შეესაბამება." - ციტირებს სიიარტოს სპიკერი.
