სოციალური კვლევისა და ანალიზის ინსტიტუტის (ISSA) ახალი კვლევის მიხედვით, მიმდინარე საპროტესტო აქციებს საქართველოს მოსახლეობის 43% ემხრობა, ხოლო 35% - არა. მხარდაჭერა მნიშვნელოვნად იზრდება თბილისელებში (62%) და პროევროპული ოპოზიციის ამომრჩევლებში (78%).
რეგიონებში საპროტესტო აქციებს არ ემხრობა 40%, ხოლო ემხრობა 35%.
რაც შეეხება ქართული ოცნების ამომრჩევლებს, საპროტესტო აქციებს არ ემხრობა გამოკვეთილი უმრავლესობა (75%), ხოლო ემხრობა - 7%.
ამავე კვლევის მიხედვით, ახალი საპარლამენტო არჩევნების დანიშვნის მომხრეა საქართველოს მოსახლეობის (55%), თბილისის (63%) და პროევროპული ოპოზიციის ამომრჩეველთა (88%). რეგიონებში ახალ საპარლამენტო არჩევნებს მხარს უჭერს ყოველი მეორე.
ახალი საპარლამენტო არჩევნების დანიშვნას ეწინააღმდეგება ქართული ოცნების ამომრჩეველთა 82%.
მეტი მხარდაჭერაა გამოხატული საპროტესტო აქციების დროს დაკავებული ადამიანების გათავისუფლების მიმართ. საქართველოს მოსახლეობის 73% ემხრობა დაკავებულების გათავისუფლებას, თბილისელების 79%, რეგიონების - 70%, ხოლო პროევროპული ოპოზიციის ამომრჩევლის 92%.
ISSA აღნიშნავს, რომ თვით ქართული ოცნების ამომრჩევლების 40% ემხრობა საპროტესტო აქციების დროს დაკავებული ადამიანების გათავისუფლებას (ეწინააღმდეგება - 50%).
სოციალური კვლევისა და ანალიზის ინსტიტუტმა (ISSA) სამოქალაქო საზოგადოების ფონდის დაფინანსებით საველე სამუშაოები 2025 წლის 17-29ივნისის შუალედში ჩაატარა. ორგანიზაციამ პირისპირ ინტერვიუს გზით 2 000 რესპონდენტი გამოკითხა - სამიზნე ჯგუფს საქართველოს სრულწლოვანი მოსახლეობა წარმოადგენდა.
შერჩევის ცდომილება იყო ±2.2% მთლიანი შერჩევისთვის, 95%-იანი სანდოობით, გამოპასუხების წილი კი - 71%. რაც შეეხება შერჩევის მეთოდს - კლასტერული შერჩევა წინასწარი სტრატიფიკაციით.
