NATO-ს გენერალურმა მდივანმა მარკ რუტემ 26 მაისს განაცხადა, რომ მისი ვარაუდით, ალიანსის წევრი სახელმწიფოები მომდევნო თვეს ჰააგის სამიტზე თავდაცვისთვის ზოგად, მშპ-ს 5%-იან ბიუჯეტზე შეთანხმდებიან.
"ჩემი ვარაუდით, ჰააგაში მაღალ თავდაცვით ხარჯს დავისახავთ მიზნად, ჯამში [მშპ-ს] 5%-იანს," თქვა რუტემ NATO-ს საპარლამენტო ასამბლეის შეხვედრაზე.
"ვთქვათ, ეს არის 5%, მაგრამ არ განვმარტავ ცალკეულ დანაწილებას, მაგრამ ეს 3%-ზე შესამჩნევად მეტი იქნება, როცა ეს უშუალო ხარჯს შეეხება და ეს ასევე იქნება თავდაცვასთან დაკავშირებული მიზნობრივი ხარჯვა," დაამატა მან.
მანამდე გამოცემა Reuters წერდა, რომ რუტეს ინიციატივით, NATO-ს წევრმა სახელმწიფოებმა თავდაცვის ხარჯი თავიანთი მშპ-ს 3.5%-მდე უნდა დახარჯონ და დამატებით 1.5% ზოგადად უსაფრთხოებასთან დაკავშირებული საკითხებისთვის უნდა გამოყონ, რათა ალიანსი თანხვედრაში მოვიდეს პრეზიდენტ დონალდ ტრამპის პოზიციასთან, რომელიც თავდაცვაზე მშპ-ს 5%-ის დახარჯვას ითხოვს.
გავრცელებული ინფორმაციით, NATO აპირებს, რომ თავდაცვის ბიუჯეტისთვის ახალ მიზნობრივ მაჩვენებელზე შეთანხმებას ჰააგის სამიტზე მიაღწიონ, რომელიც 24-25 ივნისს გაიმართება.
სამიტს უკრაინის პრეზიდენტი ვოლოდიმირ ზელენსკიც დაესწრება. აღნიშნული ინფორმაცია ნიდერლანდების თავდაცვის მინისტრმა რუბენ ბრეკელმანსმა დაადასტურა.
ბრეკელმანსის თქმით, ჯერჯერობით უცნობია შეხვდება თუ არა ზელენსკი აშშ-ს პრეზიდენტ დონალდ ტრამპს, რომელიც ასევე დაესწრება სამიტს.
