ისრაელის პრემიერმინისტრის ბენიამინ ნეთანიაჰუს განცხადებით, იმის გამო, რომ ჰამასმა ისრაელს დაღუპული მძევლის, 32 წლის შირი ბიბასის ცხედარი არ გადასცა, "ისრაელი ჰამასს გადაახდევინებს". ჰამასის ტყვეობაში დაღუპული 4 ისრაელელი მძევლის - 2 მცირეწლოვანი ბავშვის, კფირ და არიელ ბიბასების, მათი დედის, სირი ბიბასისა და 83 წლის მამაკაცის, ოდედ ლიფშიცის ცხედრების გადაცემაზე ჰამასი ისრაელთან წინაწარ იყო შეთანხმებული.
20 თებერვალს ჰამასმა ისრაელს გადასცა კიდეც 4 ცხედარი, თუმცა ექსპერტიზამ დაადგინა, რომ ცხედარი, რომელიც, ჰამასის თქმით, შირი ბიბასს ეკუთვნოდა, სხვა ქალის ცხედარი იყო. მეტიც, ექსპერტიზის დასკვნის მიხედვით, ცხედარი ჰამასის ტყვეობაში მყოფ არცერთ ისრაელელ მძევალს არ ეკუთვნის.
ნეთანიაჰუმ კუბოში შირი ბიბასის ნაცვლად ღაზელი ქალის ცხედრის მოთავსების გამო ჰამასი "გამოუთქმელად ცინიკურ" ქმედებაში დადანაშაულა.
"ჩვენ ვიმოქმედებთ განზრახვით, რომ შირი შინ დავაბრუნოთ სხვა ყველა მძევალთან ერთად, ისინი ცოცხლები იქნებიან თუ გარდაცვლილები და უზრუნველვყოფთ, რომ ჰამასმა სრულად გადაიხადოს შეთანხმების ამ სასტიკი და ბოროტი დარღვევის გამო". - თქვა ნეთანიაჰუმ ვიდეო-მიმართვაში.
ჰამასის მიერ მართული ღაზის მთავრობის მედია ოფისის დირექტორის, ისმაილ ალ-ტაუაბტამ მომხდარზე განაცხადა, რომ შირი ბიბასის ცხედრის ნაწილები, სავარაუდოდ, სხვა ადამიანის სხეულის ნაწილებთანაა შერეული. ალ-ტუაბტას და, ზოგადად, ჰამასის მტკიცებით, ბიბასები ღაზაში ისრაელის საჰაერო იერიშის შედეგად დაიღუპნენ.
ჰამასმა 2023 წლის ნოემბერში განაცხადა, რომ მცირეწლოვნები და მათი დედა ისრაელის საჰაერო იერიშის შედეგად დაიღუპნენ. თუმცა ისრაელის არმიის განცხადებით, დაზვერვის მონაცემები და ექსპერტიზის დასკვნა აჩვენებს, რომ მცირეწლოვნები ტერორისტებმა გამიზნულად დახოცეს.
ნეთანიაჰუმ განცხადების გაკეთებისას არ დააზუსტა, თუ რას მოიცავს ისრაელის სამომავლო პასუხი ჰამასისადმი, თუმცა ინციდენტმა კიდევ ერთხელ გაუსვა ხაზი მხარეებს შორის იანვარში მიღწეული ცეცხლის შეწყვეტისა და მძევლების გაცვლის შეთანხმების სიმყიფეს.
ისრაელის არმიის განცხადებით, 20 თებერვალს ჰამასის მიერ გადაცემული 4 ისრაელელი მძევლის ცხედრებიდან სამის იდენტიფიცირება მოხერხდა, მათ შორის, 4 წლის არიელ ბიბასის, 9 თვის კფირ ბიბასისა და 83 წლის ოდედ ლიფშიცის, თუმცა ცხედარი, რომელიც, ჰამასის თქმით, ბავშვების დედას, შირი ბიბასს ეკუთვნოდა, სხვა ადამიანის ცხედარი აღმოჩნდა.
"ეს არის ჰამასის ტერორისტული ორგანიზაციის უკიდურესი სიმძიმის დარღვევა". - ნათქვამია ისრაელის არმიის განცხადებაში.
ჰამასი მძევლების ისრაელისთვის გადაცემამდე ისრაელის მთავრობას უგზავნის გასათავისუფლებელი მძევლების სახელებს. ისრაელსა და ჰამასს შორის შეთანხმება ცეცხლის შეწყვეტისა და მძევლების გაცვლის შესახებ ძალაში 19 იანვარს შევიდა, რის შემდეგაც ეტაპობრივად ისრაელს 28 მძევალი გადასცა. მათგან ქვეყანას 24 დაუბრუნდა ცოცხალი, ხოლო 4, 20 თებერვლის გაცვლის ფარგლებში, გარდაცვლილი.
ისრაელის შესაბამისმა სამსახურმა ცხედრების იდენტიფიცირების შედეგად დაადგინა, რომ ერთ-ერთი ცხედარი არამხოლოდ შირი ბიბასს არ ეკუთვნოდა, არამედ არც ნებისმიერ სხვა ისრაელელ მძევალს.
ეს არის ანონიმური, არაიდენტიფიცირებული ცხედარი. ჩვენ მოვითხოვთ, ჰამასმა დააბრუნო შირი სახლში ყველა სხვა მძევალთან ერთად". - წერია ისრაელის სასამართლო მედიცინის ეროვნული ინსტიტუტის განცხადებაში.
ცნობისთვის, 20 თებერვალს პალესტინურმა ტერორისტულმა ორგანიზაცია ჰამასმა ისრაელს 4 დაღუპული ისრაელელი მძევლის ცხედრები გადასცა. მათ შორისაა 2 მცირეწლოვანი ბიჭი, რომლებზეც დიდი ხანია, ვარაუდობდნენ, რომ ტერორისტების ტყვეობაში დაიღუპნენ.
მხარეებს შორის ცეცხლის შეწყვეტისა და მძევლების გაცვლის შეთანხმების ფარგლებში ეს პირველი შემთხვევაა, როდესაც ჰამასმა ისრაელს მძევლების ცხედრები გადასცა.
4 დაღუპულ ისრაელელ მძევალს შორისაა 32 წლის ქალი, შირი ბიბასი, მისი ორი მცირეწლოვანი ვაჟი - 4 წლის არიელი და 9 თვის კფირი და 84 წლის მამაკაცი, ოდედ ლიფშიცი. ყველა მათგანი ტერორისტებმა 2023 წლის 7 ოქტომბერს, ისრაელზე მოულოდნელი თავდასხმის დროს გაიტაცეს.
შირი ბიბასის მეუღლე, დაღუპული მცირეწლოვანი არიელისა და კფირის მამა, იარდენ ბიბასი ჰამასის ტყვეობაში 16 თვის განმავლობაში იმყოფებოდა. იგი 1-ელ თებერვალს გათავისუფლდა.
"ჩვენი გულები - მთელი ერის გული - დამსხვრეულია. ისრაელის სახელმწიფოს სახელით, გიხრით თავს და გთხოვთ პატიებას. პატიებას, რომ ვერ დაგიცავით იმ საშინელ დღეს. პატიებას, რომ ვერ დაგაბრუნეთ შინ უსაფრთხოდ". - განაცხადა ისრაელის პრეზიდენტმა ისააკ ჰერცოგმა.
ტერორისტებმა წითელი ჯვრისთვის ცხედრების გადაცემამდე ღაზის სექტორის ქალაქ ხან-იუნისში, ტრადიციულად, სცენა მოაწყვეს და სცენაზე 4 შავი კუბო დემონსტრაციულად დაასვენეს. სცენაზე აღმართულ ბანერზე დაღუპული მძევლების სურათებთან ერთად ისრაელის პრემიერმინისტრ ბენიამინ ნეთანიაჰუს გამოსახულება იყო დატანილი. ბანერი ნეთანიაჰუს გამოსახავდა, როგორც ვამპირს. ტერორისტების მტკიცებით, მძევლები ღაზაზე ისრაელის ერთ-ერთი იერიშის შედეგად დაიღუპნენ.
ნეთანიაჰუს ოფისმა განცხადებაში დაადასტურა, რომ ისრაელმა "4 მძევლის კუბოები მიიღო".
ცეცხლის შეწყვეტისა და მძევლების გათავისუფლების შესახებ ჰამას-ისრაელის შეთანხმების ფარგლებში, რომელიც ძალაში ომის დაწყებიდან დაახლოებით 15 თვის შემდეგ, 19 იანვარს შევიდა, ჰამასმა ამ დროისთვის ისრაელს 28 მძევალი გადასცა - მათგან 24 ცოცხალი, ხოლო 4 დაღუპული. ისრაელიდან ღაზის სექტორში დაბრუნდა ასობით პალესტინელი პატიმარი.
შეთანხმება სამ ეტაპს მოიცავს. პირველ ეტაპზე, რომელიც ექვსი კვირის განმავლობაში გაგრძელდება, ჰამასი 33-დან 25 ისრაელელ მძევალს გაათავისუფლებს (მათგან 8 ტყვეობაში გარდაიცვალა), მათ შორის, ქალებს (სამხედრო და სამოქალაქო პირებს), ბავშვებს და 50 წელს გადაცილებულ მამაკაცებს. ისრაელი კი პირველი ფაზის ბოლომდე ციხეებში დაკავებულ პალესტინელ ქალებსა და 19 წლამდე პირებს გაათავისუფლებს.
