ქართული ოცნება ავრცელებს ინფორმაციას, რომ საფრანგეთის პრეზიდენტის, ემანუელ მაკრონის ინიციატვით, მასსა და ივანიშვილს შორის სატელეფონო საუბარი შედგა.
პარტიის ცნობით, მაკრონსა და ივანიშვილს შორის საუბარი 1 საათს გაგრძელდა.
"საფრანგეთის პრეზიდენტის ინიციატივით, სატელეფონო საუბარი შედგა „ქართული ოცნების“ საპატიო თავმჯდომარეს, ბიძინა ივანიშვილსა და ემანუელ მაკრონს შორის. მაკრონმა აღნიშნა, რომ წუხს საქართველოში შექმნილი ვითარების გამო და ამ ვითარების სრულად განმუხტვაში თავისი წვლილის შეტანის სურვილი გამოთქვა. თავის მხრივ, ბიძინა ივანიშვილმა საფრანგეთის პრეზიდენტს ინიციატივისათვის მადლობა გადაუხადა და ერთობლივი ძალისხმევის იდეას მიესალმა.
ივანიშვილი და მაკრონი შეთანხმდნენ, რომ მომდევნო დღეებში კვლავ შედგება კონტაქტი და შეფასდება მიღწეული პროგრესი. საუბარი ერთ საათს გაგრძელდა" - ნათქვამია ქართული ოცნების განცხადებაში.
