სტატისტიკის ეროვნული სამსახურის დაზუსტებული მონაცემებით 2023 წელს მთლიანი შიდა პროდუქტის მოცულობა მიმდინარე ფასებში 80 882.8 მილიონ ლარს გაუტოლდა. საქსტატის ცნობით, ეს 11.0%-ით მეტია წინა წლის შესაბამის მაჩვენებელთან შედარებით
ამასთან, რეალური მთლიანი შიდა პროდუქტის ზრდამ 2023 წელს, წინა წელთან შედარებით 7.8% შეადგინა.
საქსტატის ცნობით, მთლიანი შიდა პროდუქტის დარგობრივ სტრუქტურაში ყველაზე დიდი წილით გამოირჩევა საბითუმო და საცალო ვაჭრობა, ავტომობილების და მოტოციკლების რემონტი (16.0%) და უძრავ ქონებასთან დაკავშირებული საქმიანობები (10.6%). შემდგომ პოზიციებს იკავებს დამამუშავებელი მრეწველობა (9.6%), მშენებლობა (7.6%), სოფლის სატყეო და თევზის მეურნეობა (6.9%), სახელმწიფო მმართველობა და თავდაცვა, სავალდებულო სოციალური უსაფრთხოება (6.7%), ტრანსპორტი და დასაწყობება (6.1%), ინფორმაცია და კომუნიკაცია (6.0%), საფინანსო და სადაზღვევო საქმიანობები (5.0%).
"2023 წელს წინა წლის შესაბამის პერიოდთან შედარებით ზრდის მიმართულებით მნიშვნელოვანი წვლილი შეიტანა შემდეგმა დარგებმა: საბითუმო და საცალო ვაჭრობა; ავტომობილების და მოტოციკლების რემონტი (17.8%), ინფორმაცია და კომუნიკაცია (27.5%), მშენებლობა (15.0%), სახელმწიფო მმართველობა და თავდაცვა, სავალდებულო სოციალური უსაფრთხოება (15.6%), განათლება (18.0%), ტრანსპორტი და დასაწყობება (12.3%).
კლება იყო შემდეგ დარგებში: სოფლის, სატყეო და თევზის მეურნეობა (3.4%), სამთომოპოვებითი მრეწველობა (19.6%), უძრავ ქონებასთან დაკავშირებული საქმიანობები (2.0%)" - წერს საქსტატი.
