ბელარუსის ავტოკრატმა ლიდერმა, ალექსანდრ ლუკაშენკომ სახელმწიფო უსაფრთხოების გაფართოებულ სხდომაზე სიტყვით გამოსვლის დროს თქვა, რომ საქართველოს NATO-ში "ჩათრევის" შემთხვევაში "ყველაფერი უკრაინის სცენარით მოხდება".
"NATO-ში ფინეთის შესვლა, მალე კი შვედეთისაც, ეს აღმოსავლეთით ექსპანსიის მომდევნო ეტაპია. ალიანსში ჩაითრევენ ბოსნია-ჰერცეგოვინასაც, მოლდოვასაც, საქართველოსაც, სერბეთსაც და ეს ყველაფერი უკრაინის სცენარით განვითარდება." – თქვა ლუკაშენკომ.
ლუკაშენკომ ხაზი გაუსვა საკუთარ მოსაზრებას, რომ უკრაინის NATO-სთან პარტნიორობა ომით დასრულდა.
ბელარუსი დიქტატორის მტკიცებით, "კოლექტიური დასავლეთის" მადა და აქტიურობა გაიზრდება.
"ჩვენ, ფაქტობრივად, ვიმყოფებით უდიდესი გაჭიანურებული სამხედრო-პოლიტიკური კრიზისის ეპიცენტრში, იყენებენ დაშინების მსოფლიოსავით ძველ მეთოდებს. პროგნოზები დამამშვიდებელი არაა. კოლექტიური დასავლეთის მადა და აქტიურობა მხოლოდ გაიზრდება. ვაშინგტონი და მისი მოკავშირეები გააგრძელებენ NATO-ს გაფართოებას. მათთვის ძალიან ხელსაყრელი სიტუაციაა." – თქვა ლუკაშენკომ.
როგორც ლუკაშენკო კვლავ ირწმუნება, დასავლეთში სურთ, რომ ომში ბელარუსიც ჩაითრიონ.