პარლამენტთან საოკუპაციო რეჟიმის მიერ დაკავებული ირაკლი ბებუას მხარდასაჭერი აქცია გაიმართა. აქციის მონაწილეების და ირაკლი ბებუას ოჯახის "უპირობო მოთხოვნა" უკანონო პატიმრის ქართული მხარის მიერ კონტროლირებად ტერიტორიაზე გადმოყვანაა. ირაკლი ბებუას ოჯახის წევრების შეფასებით, სახელმწიფოს გულგრილი დამოკიდებულება აქვს ოჯახის მიმართ.
"ჩვენი სახელმწიფო არაა უნარიანი, სამი წლის თავზე საკუთარი მოქალაქე გადმოიყვანოს საქართველოს კონტროლირებად ტერიტორიაზე, რასთან გვაქვს საქმე - უუნარო სახელმწიფოსთან თუ არასაკმარის მონდომებასთან? ამ კითხვაზე ვერ ვცემ პასუხს და თქვენთვის მომინდია.
ჩვენი მოთხოვნა არის უცვლელი - ოჯახი არ გაჩერდება, სანამ ირაკლი არ იქნება გათავისუფლებული, ვთხოვთ, გამოიყენონ მათ ხელთ არსებული ყველა ბერკეტი, იმიტომ, რომ კარგად ვიცით, აქვთ შესაძლებლობები, რომ იმოქმედონ და გადმოიყვანონ ირაკლი ჩვენთან, მოვითხოვთ, მოხდეს სასწრაფოდ მისი გადმოყვანა საქართველოს კონტროლირებად ტერიტორიაზე" - თქვა ირაკლი ბებუას ოჯახის წევრმა, თამუნა ბებუამ.
არასამთავრობო ორგანიზაცია სოციალური სამართლიანობის ცენტრის ინფორმაციით, ოკუპირებული აფხაზეთის მარიონეტული მთავრობის მიერ ე.წ სიმბოლიკის დაწვისთვის დაკავებული ირაკლი ბებუას ჯანმრთელობის მდგომარეობა დამძიმდა. ორგანიზაციაში ამბობენ, რომ "არსებითია მისი დროული გათავისუფლება ჯანმრთელობის მდგომარეობის კრიტიკულად გაუარესების თავიდან აცილებისა და მისი უსაფრთხოების, სიცოცხლისა და ჯანმრთელობის დაცვის მიზნით".
2020 წლის 30 სექტემბერს საქართველოს მოქალაქე ირაკლი ბებუამ აფხაზეთის ომში გამარჯვებისთვის მიძღვნილ ღონისძიებაზე, გალში ოკუპირებული აფხაზეთის ე.წ დროშის ფერებით გაფორმებული ტილო და მასზე დამაგრებული გერბი დაწვა. ოკუპირებული აფხაზეთის ე.წ საგამოძიებო სამსახურების მტკიცებით, ირაკლი ბებუას სახლის ჩხრეკისას ხელყუმბარა იპოვეს. ირაკლი ბებუას 9-წლიანი პატიმრობა უკანონოდ მიუსაჯეს.