ნიკა გვარამია ეხმაურება სალომე ზურაბიშვილის გადაწყვეტილებას, არ შეუწყვიტოს ოთარ ფარცხალაძეს საქართველოს მოქალაქეობა და აღნიშნავს, რომ ზურაბიშვილის გადაწყვეტილება სისხლის სამართლებრივად უშედეგო და კონსტიტუციის მოთხოვნასთან შეუსაბამოა.
"ზურაბიშვილის გადაწყვეტილება სისხლის სამართლებრივად უშედეგოა და კონსტიტუციის მოთხოვნასთან შეუსაბამო. თუ მას ე.წ. მორალური გაკიცხვის პოზიციის ჩვენება უნდოდა გუშინდელი განცხადებით, მაშინ უნდა გამოვიდეს და ეს განმარტოს, ამის შემდეგ კი მიიღოს სამართლებრივად ერთადერთი სწორი გადაწყვეტილება ფარცხალაძისთვის მოქალაქეობის შეწყვეტის შესახებ.
თეორიულად, მოქალაქეობის არშეწყვეტის ერთადერთი სამართლებრივი შედეგი, რაც ამას შეიძლება ფარცხალაძის საზიანოდ მოყვეს, მისი სანქციების ქვეშ შენარჩუნებაა საქართველოს მოქალაქის სტატუსით, რაც მის პოზიციას უფრო მოწყვლადს ხდის, ვიდრე მხოლოდ რუსეთის მოქალაქეობის შემთხვევაში.
პოლიტიკურად, ზურაბიშვილს შესაძლოა სურდეს საქართველოს ხელისუფლების სანქციებზე რეაგირების (უფრო სწორად, მისი არქონის ან არასათანადო რეაგირების) ხაზგასმა და შიდა და საერთაშორისო საზოგადოებისთვის ამის ჩვენება. ეს რამდენად საჭირო და მნიშვნელოვანია, სხვა საკითხია.
რაც შეეხება ფარცხალაძის გადაადგილების სიმარტივეს ქართული პასპორტით, მის მდგომარეობაში რომელი პასპორტით გადაადგილდება, დიდი მნიშვნელობა არა აქვს: რეაგირება მაინც უნდა მისცეს ევროკავშირის წევრმა ნებისმიერმა ქვეყანამ. არადემოკრატიულ ქვეყანაში რუსული პასპორტითაც მშვენივრად შევა, ქართული პასპორტი დამატებით ინსტრუმენტად რაში უნდა სჭირდებოდეს?
ზოგადად კი, შექმნილ ვითარებაში, ნებისმიერი ბუნდოვანი გადაწყვეტილება არაა სასარგებლო. რუსული რეჟიმის პირობებში, ყოველთვის ჯობია განუხრელად მივყვეთ კანონს, მინიმუმ შეთქმულებების თეორიების და ასევე რუსული ჩანაფიქრებისთვის უნებლიედ ხელის შეწყობის თავიდან ასარიდებლად". - წერს გვარამია.
ამასთან, გვარამია დასძენს, რომ ზურაბიშვილის გადაწყვეტილების განმარტების მცდელობა იყო მისი გუშინდელი პოსტი, სადაც ფარცხალაძისთვის მოქალაქეობის არშეწყვეტაზე ამბობდა: "საქართველოს იურისდიქციაში სრულად დატოვა ნებისმიერ დანაშაულზე პასუხისმგებლობის მიზნით. ახლა ვერც დასავლეთს ეტყვი, რუსეთში გაიქცა, ჩვენი მოქალაქე არაა და ექსტრადიციას ვერ მოვითხოვო. აქაა და აღარც უნდა გაუშვა არსად".
"ps გუშინდელი ჩემი სტატუსი ზურაბიშვილის გადაწყვეტილების განმარტების მცდელობაა, მეგობრებო, და არა ჩემი პოზიცია. გმადლობთ სამართლებრივი განმარტებებისთვის და "არაგმადლობთ" კონსპირაციებისთვის. კარგი იქნება, ამდენი შეთქმულების თეორიით (და არა მხოლოდ ამ საკითხზე) ბოლომდე თუ არ შევირყევით ყველა ერთად". - წერს გვარამია.
22 სექტემბერს საქართველოს პრეზიდენტის ადმინისტრაციამ განცხადება გაავრცელა, რომლის მიხედვითაც სალომე ზურაბიშვილი ოთარ ფარცხალაძეს საქართველოს მოქალაქეობას არ შეუწყვეტს.
მანამდე, 19 სექტემბერს, ზურაბიშვილის ადმინისტრაცია წერდა, რომ პრეზიდენტი იუსტიციის სამინისტროდან ელოდებოდა ფარცხალაძისთვის საქართველოს მოქალაქეობის შეწყვეტაზე დასკვნას და მას დაუყოვნებლივ დააკმაყოფილებდა.
