რუსეთის თავდაცვის მინისტრის, სერგეი შოიგუს თქმით, პოლონეთი დასავლეთ უკრაინის ოკუპაციისთვის სამხედრო შენაერთის შექმნას გეგმავს. ამის შესახებ სერგეი შოიგუმ თავდაცვის სამინისტროს კოლეგიის სხდომაზე ისაუბრა.
"არსებობს გეგმები, რეგულარულ საფრუძველზე შეიქმნას ე.წ. პოლონურ-უკრაინული შენაერთი, ვითომდა დასავლეთ უკრაინის უსაფრთხოების უზრუნველსაყოფად, არსებითად კი ამ ტერიტორიის შემდგომი ოკუპაციისთვის". - თქვა შოიგუმ.
გარდა ამისა, რუსეთის თავდაცვის მინისტრის თქმით, დასავლეთის მიერ უკრაინაში რესურსების დაბანდების მზადყოფნა კონფლიქტის შემდგომი ესკალაციის საფრთხეს ქმნის. მისივე თქმით, NATO-ს შეუძლია, ფინეთში განათავსოს შეიარაღება, რომელიც რუსეთის კრიტიკულ ობიექტებს დაარტყამს.
"დასავლეთით და ჩრდილო-დასავლეთით, სტრატეგიული მიმართულებებებით რუსეთის წინაშე არსებული სამხედრო საფრთხეები გაიზარდა. სერიოზულ დესტაბილიზაციურ ფაქტორს ქმნის ფინეთის NATO-ში შესვლა და პერსპექტივაში ალიანსში შვედეთის გაწევრიანება. ფინეთის ტერიტორიაზე, სავარაუდოდ, განთავსდება დამატებითი სამხედრო კონტინგენტი და NATO-ს შეიარაღება, რომელსაც შესაძლებლობა ექნება, მნიშვნელოვან სიღრმეზე დაარტყას კრიტიკულად მნიშვნელოვან ობიექტებს რუსეთის ჩრდილო-დასავლეთით". - თქვა შოიგუმ.
