ყალბი პირადობების და მართვის მოწმობების დამზადება-გასაღებისთვის 2 პირი დააკავეს

ფინანსთა სამინისტროს საგამოძიებო სამსახურმა ყალბი ოფიციალური დოკუმენტების დამზადება-გასაღების ფაქტზე ორი პირი დააკავა. 

“გამოძიებით დადგენილია, რომ ბრალდებულები, უკანონო მატერიალური სარგებლის მიღების მიზნით, დაინტერესებულ პირებზე, სისტემატურად ამზადებდნენ და ასაღებდნენ პირადობის დამადასტურებელ ყალბ ოფიციალურ დოკუმენტებს.

ბრალდებულები დააკავეს მაშინ, როცა ერთ-ერთ პირზე საქართველოს მოქალაქის ყალბი მართვის მოწმობას და უცხო ქვეყნის მოქალაქის ყალბი პირადობის მოწმობას 1 250 ევროს სანაცვლოდ ყიდდნენ.

ჩატარებული საგამოძიებო მოქმედებების შედეგად, დამატებით ამოღებულ იქნა უცხო ქვეყნის მოქალაქეების პირადობის მოწმობები” - აცხებს საგამოძიებო სამსახური.

გამოძიება მიმდინარეობს საქართველოს სისხლის სამართლის კოდექსის 362-ე მუხლის მე-2 ნაწილით, რაც სასჯელის სახით ითვალისწინებს თავისუფლების აღკვეთას 3-დან 6-წლამდე ვადით.