საგარეო და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ჯოზეფ ბორელის თქმით, ევროკავშირი შეშფოთებულია Nord Stream-ის გაზსადენების დაზიანების გამო და მიიჩნევს, რომ აღნიშნული ინციდენტები შემთხვევითობა არ არის.
"უსაფრთხოება და გარემოსდაცვითი საკითხები უმთავრესი პრიორიტეტია. ეს ინციდენტები არ არის შემთხვევითობა და ყველა ჩვენგანს აზარალებს. ყველა ხელმისაწვდომი ინფორმაცია აჩვენებ, რომ ეს გაჟონვა არის განზრახ ქმედების შედეგი". - წერია განცხადებაში.
ბალტიის ზღვაში გამავალ რუსულ გაზსადენებზე გაჟონვა მოხდა. შემთხვევის მიზეზი ჯერჯერობით დაუდგენელია.
Reuters-ის ცნობით, გაჟონვა შვედეთისა და დანიის ეკონომიკურ ზონაში, კუნძულ ბიორნჰოლმის მიმდებარედ, ერთმანეთთან ახლოს მდებარე ჩრდილოეთის ნაკადი 1-ისა და ჩრდილოეთის ნაკადი 2-ის გაზსადენებზე მოხდა.
"გუშინ, რუსეთსა და დანიას შორის მდებარე ერთ-ერთ გაზსადენზე, ჩრდილოეთის ნაკადი 2-ზე გაჟონვა მოხდა. გაზსადენი არ ფუნქციონირებს, მაგრამ დატუმბულია გაზით, რომელიც მიედინება. დღეს კი შესაბამისმა სამსახურებმა, გაავრცელეს ინფორმაცია, რომ ორი გაჟონვა მოხდა გაზსადენ ჩრდილოეთის ნაკადი 1-ზეც, რომელიც არ ფუნქციონირებს, მაგრამ ასევე დატუმბულია გაზით". - თქვა დანიის ენერგეტიკის მინისტრმა, დენ იორგენსენმა.
შვედეთის საზღვაო სააგენტოს ცნობით, ამ ეტაპზე, შემთხვევის ადგილიდან 5 კილომეტრის რადიუსში გემების გადაადგილება შეზღუდულია.
"ჩრდილოეთის ნაკადი 1-ის ორი მილი დაზიანდა – ერთი შვედეთის ეკონომიკურ ზონაში, მეორე კი დანიის. ისინი ერთმანეთთან ძალიან ახლოს არიან. ვაკვირდებით, რომ ამ ადგილს არცერთი გემი არ მიუახლოვდეს". - აღნიშნულია შვედეთის საზღვაო სააგენტოს განცხადებაში.
ამასთან, გაზსადენების ქსელზე მომუშავე ექსპერტები და ასევე, რუსული მხარე, საბოტაჟის შესაძლებლობასაც არ გამორიცხავენ.
"არსებობს იმის ნიშნებიც, რომ საქმე გვაქვს წინასწარ განზრახულ დაზიანებასთან, თუმცა დასკვნების გამოტანა ჯერ ადრეა. მთავარი კითხვაა: ვინ მიიღებს ამისგან სარგებელს?". - უთხრა Reuters-ს ევროპის თავდაცვის სისტემაში მომუშავე წყარომ.
კრემლის სპიკერის, დმიტრი პესკოვის თქმით, ამ ეტაპზე არცერთი ვერსიის გამორიცხვა არ შეიძლება და შესაძლოა, საბოტაჟს ჰქონდეს ადგილი.
