აშშ-მ უკრაინისთვის $820-მილიონიანი ახალი პაკეტი გამოყო, რაშიც NASAMS-ის სისტემაც შედის

აშშ-ს თავდაცვის დეპარტამენტის, პენტაგონის ცნობით, ვაშინგტონი უკრაინის დასახმარებლად დამატებით $820 მილიონ დოლარს გამოყოფს. 

დახმარების ახალი პაკეტიდან $50 მილიონი გამოყოფილია საპრეზიდენტო დანაზოგებიდან, $770 მილიონი კი უკრაინის უსაფრთხოების დახმარების ინიციატივის (USAI) თანხებიდან.

საპრეზიდენტო თანხებით უკრაინას გადაეცემა მაღალი მობილობის საარტილერიო-სარაკეტო სისტემის (HIMARS) დამატებითი საბრძოლო მასალა.

USAI-ის ფარგლებით გამოყოფილი თანხებით კი უკრაინა მიიღებს ორ მოწინავე მიწა-ჰაერის ეროვნულ სარაკეტო სისტემას (NASAMS), 155 მმ.-იანი არტილერიის 150 000 ჭურვსა და არტილერიის საწინააღმდეგო 4 რადარს.

NASAMS-ის ჰაერსაწინააღმდეგო სისტემის რაკეტებს 30 კილომეტრის რადიუსსა და 21 კილომეტრის სიმაღლეზე ფრენა შეუძლიათ.