როცა იმუნიზაციის გეგმა მზადდებოდა, ჩვენ გვქონდა 65 ათასი ადამიანის, - ვინც სამედიცინო სექტორშია დასაქმებული, - პერსონალური სია. ესენი არ არიან მხოლოდ ექიმები, ასევე ექთნები, უმცროსი და დამხმარე სამედიცინო პერსონალი. იქიდან დღეს დაახლოებით 12 ათასამდე ადამიანია აცრილი. ამ 12 000-ში ყველაზე მეტი, 50% არიან ექიმები. დღეს ქვეყანაში დაახლოებით 18 ათასი ექიმია, მათგან 6-დან 7 ათასამდეა აცრილი.
უნდა გავითვალისწინოთ ის, რომ სამედიცინო პერსონალმა პანდემიის დროს ყველაზე დიდი დარტყმა მიიღო. თუ ჩვენთან, მოსახლეობაში, საერთო ინფიცირება 7%-ია, სამედიცინო პერსონალის ინფიცირება 33%-ია, ანუ ამ 65 ათასი ადამიანიდან ინფიცირებულია 33%. მოგეხსენებათ, ჩვენთან ვაქცინაცია ინფიცირების შემთხვევაში 120 დღის შემდეგაა დაშვებული. ახალი ინიციატივაა, იმუნიზაციის საბჭოზე იხილება, რომ ეს 120 დღე შემცირდეს, ისევე როგორც რიგ ქვეყნებში - ეს გახლავთ 30-დან 90 დღემდე და, შესაბამისად, მე დარწმუნებული ვარ, რომ სამედიცინო პერსონალი უფრო აქტიური იქნება აცრების პროცესში.