საქართველოს კათოლიკოს-პატრიარქი, ილია მეორე, კახი კავსაძის გარდაცვალებას გამოეხმაურა და ის თანამედროვე ქართული ხელოვნების მშვენებად მოიხსენია.
"წავიდა ჩვენგან ბატონი კახი კავსაძე, - თანამედროვე ქართული ხელოვნების მშვენება, კავსაძეთა ცნობილი გვარის ერთ-ერთი უცნობილესი წარმომადგენელი, სიყვარულისა და ერთგულების მაგალითი, ადამიანურ მრავალ ფასეულობათა მომცველი საოცარი პიროვნება.
რამდენიმე წლის წინ იგი მძიმე სენით დაავადდა, რაც მორწმუნედ ჩამოყალიბების წინაპირობად ექცა, რადგან ღვთის სასწაულის საკუთარ თავზე განმცდელი გახდა და მისი მადლით განკურნებული, უფლის რწმენის მქადაგებლად იქცა.
ღმერთმა დალოცოს და ნათელში ამყოფოს ბატონი კახის უკვდავი სული და სავანესა მართალთასა დააწესოს, ხოლო მის ახლობლებსა და ყველა გულშემატკივარს მოანიჭოს მშვიდობა და სულიერი შეწევნა", - წერია საქართველოს საპატრიარქოს მიერ გამოქვეყნებულ წერილში.
ქართული კინოსა და თეატრის ლეგენდა, კახი კავსაძე 85 წლის ასაკში გარდაიცვალა. ნახეთ მისი 10 გამორჩეული კინოროლი.
