რუსთავი 2საჩხერის სამედიცინო კლინიკის ექიმი, რომელსაც სწრაფი ტესტის შედეგად კორონავირუსი დაუდასტურდა, საჩხერის მერის, ბენიამინ ფალავანდაშვილის, ცოლია.
მას შემდეგ, რაც 4 აპრილს ღამით გეგმიური შემოწმების დროს მის ცოლს კორონავირუსი დაუდასტურდა, ფალავანდიშვილი თვითიზოლაციაშია, თუმცა ბოლო დღეების განმავლობაში მერს მაღალი რისკის მქონე ადამიანებთან ჰქონდა კონტაქტი.
კერძოდ, სოციალური კამპანიის ფარგლებში საჩხერის მერმა 2 აპრილს სხვა მოხალისეებთან ერთად მარტოხელა მოხუცებს პირველადი საჭიროების ნივთები მიუტანა.
საჩხერის მერიის წარმომადგენლის თქმით, მერიის სოციალური კამპანიის ფარგლებში პირველადი მოხმარების ნივთები 83 მოხუცს დაურიგდა და აქციაში მონაწილეობას წითელი ჯვრის მიერ გადამზადებული მოხალისეები იღებდნენ.
"მოხალისეების ერთერთი ჯგუფის წევრი არის მერიც, რომელმაც გაიარა უსაფრთხოების ინსტრუქტაჟი," - ამბობს მერიის წარმომადგენელი მედიასთან.
თავად ბენიამინ ფალავანდიშვილის თქმით, მას უკვე გაუკეთდა ტესტი კორონავირუსზე. ფალავანდიშვილის თქმით, არ არის აუცილებელი, რომ ამ ეტაპზე თვითიზოლაციაში გადავიდეს ის ხალხი, ვისთანაც მას შეხება ჰქონდა.
"მეც ვერ ვხედავ აუცილებლობას [თვითიზოლაციაში გადავიდნენ ის პირები, ვისთანაც კონტაქტი მქონდა] და თვითონ სამედიცინო ცენტრში ვიმყოფებოდი ახლა, სანამ ჩემი ანალიზები არ იქნება, ამ წუთში არაა მაგის აუცილებლობა. მე თვითონ არ მაქვს არანაირი დისკომფორტი, არანაირი ტემპერატურა, არანაირი არაფერი. აუცილებელი რომ არ იყოს, ნამდვილად არც ვიფიქრებდი, რომ ამეღო ეს ანალიზი. როცა პასუხი იქნება, იქიდან გამომდინარე ვიმოქმედებთ,"- თქვა ფალავანდიშვილმა რუსთავი 2-ისთვის მიცემულ კომენტარში.
საჩხერის სამედიცინო ცენტრის ექიმს ახალი კორონავირუსი 4 აპრილს, საღამოს სწრაფი ტესტებით გეგმიური შემოწმების დროს დაუდასტურდა. ლუგარის ლაბორატორიის პასუხი მას ჯერჯერობით არ მიუღია. კლინიკის 100-მდე თანამშრომელი ამ დროისთვის იზოლაციაშია.
საჩხერის სამედიცინო ცენტრში ამ ეტაპზე კორონავირუსით ინფიცირებული 3 პაციენტი მკურნალობს. სავარაუდოდ, საჩხერის მერის ცოლს ვირუსი ერთერთი მათგანისგან გადაედო, თუმცა კლინიკის დირექტორი ამბობს, რომ ექიმს ინფიცირებულ პაციენტებთან შეხება შესაბამისი აღჭურვილობის გარეშე არ ჰქონია.
