მოლდოვის ყოფილი პრემიერმინისტრი ვლად ფილატი, რომელიც ამ პოსტს 2009-2013 წლებში იკავებდა, გუშინ პარლამენტის შენობაში დააკავეს. Reuters-ის ინფორმაციით, მას საბანკო თაღლითობაში მონაწილეობასა და ამ გზით 1 მილიარდი დოლარის მითვისებაში ედება ბრალი.
ფილატი გუშინ, ანტიკორუფციული ბიუროს თანამშრომლებმა, ხელბორკილებით გაიყვანეს პარლამენტის შენობიდან. მოლდოვის პარლამენტის გადაწყვეტილებით, მას დეპუტატის სტატუსი ჩამოერთვა. ამ გადაწყვეტილებას 99 პარლამენტარიდან, 79-მა დაუჭირა მხარი.
ბრალის დამტკიცების შემთხვევაში, ფილატს 15 წლამდე პატიმრობა ემუქრება. დაკავებული ყველა ბრალდებას უარყოფს. შეგახსენებთ, რომ სექტემბრის დასაწყისიდან მოლდოვაში მასობრივი აქციები ტარდება კორუფციასთან ბრძოლის და კორუმპირებული მაღალჩინოსნების დაკავების მოთხოვნით.
კორუფცია
მოლდოვის ყოფილი პრემიერმინისტრი პარლამენტში დააკავეს
REUTERS/FREDRIK SANDBERG
