საქართველოს პრეზიდენტის Facebook-ის ოფიციალურ გვერდზე მიხეილ სააკაშვილის მიმართვა გავრცელდა. ზურაბ ჭიაბერაშვილისა და ვანო მერაბიშვილის დაკავებასთან დაკავშირებით პრეზიდენტი მიმართავს მთავრობას და პრემიერმინისტრს, რომ კარგად დაუფიქრდნენ საკუთარი ნაბიჯების შედეგებს.
"უნდა გვესმოდეს, რომ თუ სასამართლომ დააკმაყოფილა პროკურატურის შუამდგომლობა ვანო მერაბიშვილისა და ზურაბ ჭიაბერაშვილის პატიმრობაზე, ეს ჩვეულებრივი იურიდიული აქტი კი არა, ქვეყნის სრულიად ახალ რეალობაში გადაყვანა იქნება. შარშან ოქტომბერში მოხდა ხელისუფლების მშვიდობიანი და მშვიდი გადაცემა არჩევნების გზით. ჩვენ გაგვიჩნდა ისტორიული შანსი გავმხდარიყავით სრულფასოვანი, წარმატებული დემოკრატია. დღეს, გაჩნდა საფრთხე ამ რეგიონის რიგით ავტორიტარულ რეჟიმად ჩამოყალიბების, რაც ეჭვის გარეშე ქვეყანას მრავალი წლით დახევს უკან, როგორც საშინაო პოლიტიკაში, ისე საგარეო ურთიერთობების მხრივ.
მივმართვ მთავრობას და განსაკუთრებით პრემიერმინისტრს, კარგად დავუფიქრდეთ ასეთი ნაბიჯების შედეგებს და ნუ დავაყენებთ ჩვენს სამშობლოს დარტყმის ქვეშ", - ნათქვამია განცხადებაში.
