საქართველოს მთავრობა გუშინ, 4 აპრილს, გამოცემა Guardian-ის მიერ გავრცელებულ ინფორმაციას გამოეხმაურა. სპეციალურ განცხადებაში აღნიშნულია, რომ საქართველოს მთავრობისთვის ცნობილია გარკვეული ვარაუდები იმის შესახებ, რომ ბიძინა ივანიშვილსა და ბრიტანეთის ვირჯინის კუნძულებზე რეგისტრირებულ ერთ-ერთ კომპანიას შორის წარსულში არსებობდა საქმიანი კავშირი.
"საქართველოს კანონმდებლობის თანახმად, საქართველოს პრემიერმინისტრი ვალდებულია, განაცხადოს მის საკუთრებაში არსებული ყველა აქტივის შესახებ. ბიძინა ივანიშვილმა არაერთხელ განაცხადა, რომ გამჭვირვალობის მაქსიმალურად უზრუნველყოფისათვის, მტკიცედ დაიცავს კანონის ყველა მოთხოვნას და საჯაროს გახდის საკუთარ ფინანსებთან დაკავშირებულ ინფორმაციას.
2011-2012 წლების საანაგრიშო პერიოდში ბიძინა ივანიშვილი, როგორც პრემიერმინისტრობის კანდიდატი და შემდგომში პრემიერმინისტრი, არ ფლობდა არანაირ წილს ზემოაღნიშნულ კომპანიაში. ამდენად, იგი არ იყო ვალდებული ეს განეცხადებინა დეკლარაციაში. ხოლო, რაც შეეხება მის საკუთრებაში არსებულ ამჟამინდელ აქტივებს, ეს ინფორმაცია კანონის სრული დაცვით გაცხადებული აქვს დეკლარაციაში", - ნათქვამია განცხადებაში.
შეგახსენებთ, 4 აპრილს Guardian-მა გამოაქვეყნა ინფორმაცია, რომ ბრიტანეთის ვირჯინის კუნძულებში რეგისტრირებული საიდუმლო კომპანიების მფლობელთა შორის საქართველოს პრემიერმინისტრი ბიძინა ივანიშვილიცაა. სიაში ივანიშვილის გარდა პაკისტანის, ინდოეთის, ტაილანდისა და ინდონეზიის მნიშვნელოვანი პირებიც მოხვდნენ.
ბრიტანელი ლიბერალ-დემოკრატები აცხადებენ, რომ ოფშორულ ზონაში რეგისტრირებული საიდუმლო კომპანიები კორუფციულ გარიგებებში მონაწილეობდნენ. ანტიკორუფციული კამპანიის წარმომადგენლები კი ბრიტანეთის პრემიერმინისტრ დევიდ კამერონს მოქმედებისკენ მოუწოდებენ.
Guardian-ის სტატიაში ასევე მითითებულია ბიძინა ივანიშვილის ოფშორული კომპანია Bosherston Overseas Corp. გამოცემა იუწყება, რომ მილიარდერი ბიზნესმენი ბიძინა ივანიშვილი, რომელიც 2012 წელს საქართველოს პრემიერმინისტრი გახდა, 2006-2009 წლებში აღნიშნული კომპანიის დირექტორი იყო. თავად კომპანია Bosherston Overseas Corp კი პანამიდან იმართებოდა აგენტის მეშვეობით. Guardian-ი წერს, რომ კომპანია 2006 წელს შეიქმნა და დღესაც მოქმედია.
სტატიაში მოყვანილია ივანიშვილის პრესმდივნის კომენტარიც: "2011-12 წლებისთვის პრემიერმინისტრ ივანიშვილს კომპანიაში წილი აღარ ჰქონდა. სწორედ ამიტომ, არ ჰქონდა ვალდებულება, ამის შესახებ ფინანსურ დეკლარაციაში განეცხადებინა".
