კოალიცია ქართული ოცნების ლიდერი ბიძინა ივანიშილი NDI-ს მიერ გამოქვეყნებულ კვლევის შედეგებს გამოეხმაურა. კოალიციის ლიდერმა კვლევაში არსებული შეკითხვების ფორმულირება გააკრიტიკა.
ჟურნალისტებთან საუბრისას ბიძინა ივანიშვილმა განაცხადა, რომ NDI-ის საქართველოში ბევრი მნიშვნელოვანი პროექტი განუხორციელებია, ,,თუმცა კვლევების ჩატარებაში პროფესიონალი არ არის.''
,,მე მათ მიმართ დიდი მადლიერების გრძნობა მაქვს. რაც შეეხება შეკითხვებს, გაუგებარია, რატომ სვამენ კითხვას, ვინ გაჰყვება ივანიშვილს ქუჩაში. კითხვის ფორმულირება კითხვას აჩენს. ისინი პროფესიონალები არ არიან, აშშ-ში არასოდეს ჩაუტარებიათ გამოკითხვა. ნაწილობრივ ვენდობით, ნაწილობრივ პროცედურასთან დაკავშირებით კითხვები გაგვაჩნია."- განაცხადა ბიძინა ივანიშვილმა.
მისივე თქმით, წინააღმდეგობრივი შედეგებია კვლევაში მოყვანილ პროცენტულ მაჩვენებლებთან მიმართებაშიც.
შეგახსენებთ, ეროვნულ-დემოკრატიულმა ინსტიტუტმა (NDI) პარტიების პოლიტიკურ რეიტინგებთან დაკავშირებით საზოგადოებრივი აზრის კვლევის შედეგები გამოაქვეყნა. აღნიშნული კვლევის თანახმად, ხვალ რომ საპარლამენტო არჩევნები იყოს ერთიან ნაციონალურ მოძრაობას ხმას გამოკითხულთა 37% მისცემდა, კოალიცია ქართულ ოცნებას 12%, ხოლო ქრისტიან-დემოკრატიულ მოძრაობას 3%. დანარჩენი პარტიების რეიტინგი კი 1%-ის ფარგლებში არის.
