აშშ-ს გამოძიების ფედერალური ბიუროს (FBI) ყოფილ დირექტორს, ჯეიმს კომის, აშშ-ს პრეზიდენტ დონალდ ტრამპისთვის სიცოცხლის მოსპობით დამუქრებისთვის ბრალდება წარუდგინეს. ბრალდებას საფუძვლად უდევს მის მიერ სოციალურ ქსელში ცოტა ხნით გავრცელებული ფოტო.
კომიმ გასულ წელს ინსტაგრამზე გამოაქვეყნა ფოტო, რომელზეც ზღვის ნიჟარებით გამოსახული იყო რიცხვები "86 47". "ოთხმოცდაექვსი" ჟარგონული ტერმინია, რომელიც "მოშორებას" ან "აღმოფხვრას" ნიშნავს. დონალდ ტრამპი კი აშშ-ს 47-ე პრეზიდენტია.
კომი ირწმუნება, რომ მან რიცხვების მნიშვნელობა არ იცოდა, თუმცა ტრამპის ადმინისტრაციის მაღალჩინოსნები ამბობენ, რომ პოსტი პრეზიდენტზე მიმართული მუქარა იყო.
"მე ჯერ კიდევ უდანაშაულო ვარ, ჯერ კიდევ არ მეშინია და ჯერ კიდევ მჯერა დამოუკიდებელი ფედერალური სასამართლო სისტემის," - განაცხადა კომიმ მას შემდეგ, რაც ბრალდება წარედგინა.
პრესკონფერენციაზე FBI-ის ამჟამინდელმა დირექტორმა, კეშ პატელმა განაცხადა, რომ როგორც ბიუროს ყოფილმა დირექტორმა, კომიმ "კარგად იცოდა, როგორ ყურადღებას და შედეგებს გამოიწვევდა ასეთი პოსტი."
სასამართლო დოკუმენტების თანახმად, კომის ბრალად ედება პრეზიდენტის წინააღმდეგ სასიცოცხლო მუქარის გაკეთება და მუქარის კომერციულ სივრცეში გავრცელება. თითოეული ბრალდება 10 წლამდე თავისუფლების აღკვეთას ითვალისწინებს.
კომი ტრამპმა მისი პირველი საპრეზიდენტო ვადის დროს გაათავისუფლა თანამდებობიდან, რის შემდეგაც ის პრეზიდენტის აქტიური კრიტიკოსი გახდა.
