უკრაინის სპეციალური ოპერაციების ძალებმა (SOF) რუსეთის მიერ ოკუპირებულ ყირიმში სამხედრო ობიექტებზე იერიში მიიტანეს, რის შედეგადაც S-400 ტიპის საჰაერო თავდაცვის სისტემის გამშვები და რუსეთის მე-18 არმიის საბრძოლო მასალების საწყობი განადგურდა.
SOF-ის განცხადებით, ერთობლივი ოპერაცია უკრაინის "სპეციალური ოპერაციების ძალების წინააღმდეგობის მოძრაობისა და ღრმა იერიშების დანაყოფების" ჩართულობით ჩატარდა.
მთავარი სამიზნეები სიმფეროპოლის მახლობლად მდებარე არსენალი და ევპატორიასთან განლაგებული საჰაერო თავდაცვის ობიექტი იყო. ოპერაცია 6 ოქტომბრის ღამეს ჩატარდა, თუმცა უსაფრთხოების მიზეზების გამო, ინფორმაცია ახლა გახდა ცნობილი.
უკრაინული მხარის ცნობით, FP-2 ტიპის დრონებმა რუსულ სამხედრო ობიექტს მონაცემების გადამოწმებისა და იდენტიფიცირების შემდეგ შეუტიეს, რასაც საბრძოლო მასალების აფეთქება და ხანძარი მოჰყვა, ხოლო S-400-ის გამშვები სისტემის განადგურებაც იმავე დღეს მოხდა.
ამასთან, სპეციალური ოპერაციების ძალები ავრცელებს ვიდეოს, რომელშიც რუსულ სამხედრო ობიექტზე დარტყმის კადრები ჩანს:
