რუსი სამხედრო ბლოგერების თანახმად, უკრაინაში დონეცკის ოლქში ოკუპირებული სოლედარის დასახლებასთან СУ-25 ტიპის რუსული მოიერიშე თვითმფრინავი ჩამოვარდა.
გავრცელებულ ვიდეოში ჩანს, რომ ერთმა თვითმფრინავმა მეორეს სავარაუდოდ შეცდომით ცეცხლი გაუხსნა და უმართავი რაკეტა ესროლა.
პრორუსი სამხედრო ბლოგერის, Fighterbomber-ის თანახმად, ჩამოვარდნილი თვითმფრინავის პილოტმა კატაპულტირება მოასწრო და გადარჩა, ამჟამად კი საავადმყოფოში იმყოფება.
უკრაინული გამოცემა Мілітарний აღნიშნავს, რომ СУ-25-ის ტიპის თვითმფრინავები საშუალოდ 40 წლისაა და ბოლო დროს უფრო და უფრო მეტი ტექნიკურ ხარვეზებსა და საგანგებო მდგომარეობებს აწყდება.
ცნობისთვის, მიმდინარე წლის 24 მარტს ერთ-ერთი СУ-25 გეგმიური სასწავლო-სავარჯიშო ფრენის დროს ტექნიკური გაუმართავობის გამო ჩამოვარდა.
მანამდე, 2023 წლის ივლისში СУ-25 ტექნიკური გაუმართავობის გამო რუსეთის კრასნოდარის ოლქის სანაპიროს მახლობლად, აზოვის ზღვაში ჩამოვარდა.
Мілітарний აღნიშნავს, რომ 2023 წელს ერთ-ერთი СУ-25 ტექნიკური გაუმართავობის გამო ასევე ბელგოროდის ოლქშიც ჩამოვარდა.
