ინდოეთის დასავლეთ ნაწილში, გუჯარათის შტატის ქალაქ აჰმედაბადის აეროპორტთან Air India-ს სამგზავრო თვითმფრინავის ჩამოვარდნის შედეგად, სულ მცირე, 204 ადამიანია დაღუპული.
დაღუპულთა რაოდენობის შესახებ ინფორმაციას ადგილობრივი პოლიცია ავრცელებს. მათივე ცნობით, საავადმყოფოში გადაყვანილია 41 ადამიანი.
გავრცელებული ინფორმაციით, ჯერ-ჯერობით უცნობია 204 გარდაცვლილიდან რამდენი იმყოფებოდა თვითმფრინავის ბორტზე და რამდენი ემსხვერპლა კატასტროფას ჩამოვარდნის ადგილზე.
Air India-ს მფლობელი კომპანიის Tata Group-ის განცხადებით, დაღუპულთა ოჯახები კომპენსაციის სახით დაახლოებით 86 000 გირვანქა სტერლინგს მიიღებენ.
მედიის ცნობით, თვითმფრინავმა კატასტროფა აფრენისთანავე განიცადა და ბორტზე სულ 242 ადამიანი იმყოფებოდა, მათ შორის, 169 ინდოეთის მოქალაქე, 53 ბრიტანეთის, 7 პორტუგალიის ერთი კი კანადის.
აფეთქების შემდეგ, ადგილობრივ მედიაში გავრცელდა კადრები, რომელშიც აეროპორტთან ახლოს ძლიერი კვამლი ჩანს და დაშავებულები საკაცეებით გადაჰყავთ.
მედიაში გავრცელებულ ერთ-ერთ ვიდეოში კი ქალი ამბობს, რომ მისი შვილი "თვითმფრინავის ილუმინატორიდან გადმოხტომის შედეგად გადარჩა".
