23 აპრილს ლონდონში უკრაინის, გაერთიანებული სამეფოს, საფრანგეთისა, გერმანიის და აშშ-ს დელეგაციებს შორის შეხვედრა გაიმართა.
შეხვედრაზე უკრაინელმა და ევროპელმა ოფიციალურმა პირებმა აშშ-ს მხარეს ომის დასრულების გეგმის მრავალპუნქტიანი ვერსია წარუდგინეს.
Reuters-მა აღნიშნულ დოკუმენტზე წვდომა მოიპოვა.
შემუშავებული გეგმის ტექსტს, Reuters-ზე დაყრდნობით, უცვლელად გთავაზობთ:
რუსეთ-უკრაინის შეთანხმების სამუშაო ჩარჩო
ცეცხლის შეწყვეტა:
-
ცეცხლის სრული და უპირობო შეწყვეტა ცაში, მიწაზე და ზღვაში.
-
ორივე მხარე აშშ-სთან და ევროპულ ქვეყნებთან დაუყოვნებლივ იწყებს მოლაპარაკებებს ცეცხლის შეწყვეტის ტექნიკურ იმპლემენტაციაზე. ეს ხდება საბოლოო სამშვიდობო შეთანხმების დღის წესრიგისა და სამუშაო ჩარჩოს მომზადების პარალელურად.
-
ცეცხლის შეწყვეტის რეჟიმის მონიტორინგი, რომელსაც აშშ უძღვება, მესამე ქვეყნების დახმარებით.
-
რუსეთი დაუყოვნებლივ აბრუნებს ყოველ დეპორტირებულ და უკანონოდ გადაადგილებულ უკრაინელ ბავშვს. ხდება ომის ყოველი პატიმრის გაცვლა ("ყველა, ყველას სანაცვლოდ" პრინციპით). რუსეთი ათავისუფლებს ყველა [ომის პატიმარ] მშვიდობიან მოქალაქეს.
უსაფრთხოების გარანტიები უკრაინისთვის:
-
უკრაინა იღებს უსაფრთხოების ძლიერ გარანტიებს, მათ შორის, აშშ-სგან (NATO-ს მეხუთე მუხლის მსგავსი შეთანხმება) მანამ, სანამ ალიანსის წევრებს შორის კონსენსუსი [უკრაინის] NATO-ში გაწევრიანების შესახებ არ არსებობს.
-
არანაირი შეზღუდვა უკრაინის თავდაცვის ძალებზე.
-
გარანტორი სახელმწიფოები ევროპული ქვეყნებისა და მსურველი არაევროპული ქვეყნებისგან შემდგარი ad hoc ჯგუფი იქნება. უკრაინის ტერიტორიაზე არ შეიზღუდება მეგობრული უცხოური ძალების [სამხედრო] ყოფნა, იარაღი და ოპერაციები.
-
უკრაინა გააგრძელებს ევროკავშირში გაწევრიანებაზე მუშაობას.
ტერიტორია:
-
ტერიტორიული საკითხები განხილული იქნება და გადაწყდება სრული და უპირობო ცეცხლის შეწყვეტის შემდეგ.
-
მოლაპარაკებები ტერიტორიის შესახებ დაიწყება მიმდინარე კონტროლის ხაზის საფუძველზე.
-
უკრაინა აშშ-ს ჩართულობით დაიბრუნებს კონტროლს ზაპოროჟიეს ატომურ ელექტროსადგურზე, ასევე კახოვკას ჰიდროელექტროსადგურს.
-
უკრაინას შეეძლება შეუფერხებელი გადასვლა დნეპრის მდინარეზე და კინბურნის სანაპიროს კონტროლი.
ეკონომიკა:
-
აშშ და უკრაინა აამოქმედებენ მინერალების შეთანხმებას და დაიწყებენ ეკონომიკურ თანამშრომლობას.
-
მოხდება უკრაინის სრული რეკონსტრუქცია და ფინანსური კომპენსაცია, მათ შორის, რუსული სუვერენული აქტივებით, რომლებიც გაყინული დარჩება მანამ, სანამ რუსეთი უკრაინას ზიანს არ აუნაზღაურებს.
-
აშშ-ს მიერ 2014 წლიდან რუსეთზე დაწესებული სანქციები შესაძლებელია, თანდათანობით შემსუბუქებას დაექვემდებაროს მას შემდეგ, რაც მდგრადი მშვიდობა იქნება მიღწეული, ხოლო [სანქციები] შესაძლოა გაგრძელდეს, თუ მოხდება სამშვიდობო შეთანხმების დარღვევა.
როგორც 24 აპრილს უკრაინის პრეზიდენტმა ვოლოდიმირ ზელენსკიმ განაცხადა, ლონდონში გამართული მოლაპარაკებების შედეგად მომზადებული დოკუმენტი ამჟამად, სავარაუდოდ, აშშ-ს პრეზიდენტ დონალდ ტრამპის მაგიდაზეა.
"შეერთებული შტატების წინადადების შემდეგ გაჩნდა სხვა დოკუმენტებიც და მე ვფიქრობ, რომ დღეს ეს ფორმატი, ეს დოკუმენტი პრეზიდენტ ტრამპის მაგიდაზეა," - თქვა ზელენსკიმ.
მოცემული გეგმა უკრაინამ და ევროპულმა ქვეყნებმა აშშ-ს მიერ წარდგენილი წინადადების საპასუხოდ მოამზადეს.
Reuters-მა აშშ-ს მიერ უკრაინისა და EU-ს ქვეყნებისთვის წარდგენილი სამშვიდობო გეგმა გაავრცელა
