აშშ-ს სახელმწიფო დეპარტამენტის პრესსპიკერის განცხადებით, უკრაინაში აშშ-ს ელჩი ბრიჯიტ ბრინკი თანამდებობას ტოვებს. იმის შესახებ, რომ ბრინკი თანამდებობის დატოვებას გეგმავდა, ცნობები თავდაპირველად ამერიკულ მედიაში გავრცელდა.
ბრინკი პოსტზე აშშ-ს ყოფილი პრეზიდენტის, ჯო ბაიდენის ადმინისტრაციის დროს, 2022 წელს დაინიშნა და მას შემდეგ კიევში აშშ-ს ელჩად მსახურობდა. Reuters-ის ანონიმური წყაროების თქმით, ელჩმა გადადგომის გადაწყვეტილება თავად მიიღო.
ბრინკი ერთ-ერთი ყველაზე მაღალი რანგის კარიერული დიპლომატია, რომელმაც აშშ-ს სახელმწიფო დეპარტამენტი იანვარში დონალდ ტრამპის გაპრეზიდენტების შემდეგ დატოვა. იგი უერთდება ათწლეულების გამოცდილების მქონე სხვა ყოფილ მაღალჩინოსნებს, რომლებმაც სახელმწიფო დეპარტამენტი ტრამპის მოსვლის შემდეგ დატოვეს, მათ შორის, აშშ-ს სახელმწიფო მდივნის მოადგილის მოვალეობის შემსრულებელს პოლიტიკურ საკითხებში, ჯონ ბასს.
ჯერჯერობით უცნობია, თუ ვინ დაიკავებს ბრინკის თანამდებობას. ამერიკელი ანონიმური მაღალჩინოსანი და საკითხზე ინფორმირებული კიდევ ერთი წყარო Reuters-ს ეუბნება, რომ პოსტზე ევროპისა და ევრაზიის საქმეთა ბიუროში სახელმწიფო მდივნის თანაშემწის მოადგილე აღმოსავლეთ ევროპის, პოლიტიკისა და რეგიონულ საკითხებში, კრის სმიტი განიხილება. სმიტი აქამდე, 2022-2023 წლებში, კიევში აშშ-ს საელჩოში ამერიკული მისიის უფროსის მოადგილედ მსახურობდა.
ბრინკი ბოლო პერიოდში რუსეთის მიერ უკრაინული ქალაქის, კრივოი როგის დაბომბვაზე გამოხმაურების გამო გააკრიტიკეს. ელჩმა X-ზე 5 აპრილის თავდასხმის შესახებ გამოქვეყნებულ განცხადებაში რუსეთი არ ახსენა.
უკრაინის პრეზიდენტმა ვოლოდიმირ ზელენსკიმ აღნიშნულის გამო აშშ-ს საელჩო გააკრიტიკა და X-ზე დაპოსტა, რომ განცხადება "საოცარი იმედგაცრუების მომტანი" იყო.
"ასეთი ძლიერი ქვეყანა, ასეთი ძლიერი ხალხი, თუმცა ასეთი სუსტი რეაქცია. მათ ეშინიათ, რომ სიტყვა 'რუსულიც' კი ახსენონ, როდესაც რაკეტაზე ლაპარაკობენ, რომელმაც ბავშვები დახოცა". - წერდა ზელენსკი.
უცნობია, უკავშირდება თუ არა ბრინკის გადადგომა აღნიშნულ მოვლენას.
Reuters-ის წყაროების თქმით, ბრინკი თანამდებობას უახლოესი კვირების განმავლობაში დატოვებს.
