უკრაინაში სამხედრო ტყვედ აყვანილი ჩინეთის ორი მოქალაქის დაკითხვის პარალელურად, პრეზიდენტი ვოლოდიმირ ზელენსკი ამბობს, რომ უკრაინაში რუსეთის მხარეს 150-ზე მეტი ჩინეთის მოქალაქე იბრძვის.
"ამ დროისთვის, გვაქვს ზუსტი მონაცემები, რომ უკრაინის წინააღმდეგ რუსეთის ომში 150-ზე მეტი ჩინეთის მოქალაქე იღებდა მონაწილეობას. ვიცით, რომ რეალური რიცხვი გაცილებით მაღალია" – ამბობს ზელენსკი.
ზელენსკიმ 8 აპრილს სოციალურ ქსელში გაავრცელა ინფორმაცია, რომ უკრაინის შეიარაღებულმა ძალებმა დონეცკის ოლქში ტყვედ აიყვანეს რუსეთის მხარეს მებრძოლი ჩინეთის ორი მოქალაქე. ზელენსკი ტყვედ აყვანილი ერთ-ერთი ჯარისკაცის ვიდეოს აქვეყნებს.
ჩინეთის საგარეო საქმეთა სამინისტრო უარყოფს და "უსაფუძვლოს" უწოდებს უკრაინის პრეზიდენტის, ვოლოდიმირ ზელენსკის ბრალდებას, რომ უკრაინაში, რუსეთის მხარეს ჩინეთის ბევრი მოქალაქე იბრძვის.
