27 თებერვლის ღამეს რუსეთმა უკრაინაზე 166 სხვადასხვა ტიპის უპილოტო საფრენი აპარატით, მათ შორის Shahed-ის ტიპის და სხვადასხვა იმიტაციური დრონებით მიიტანა იერიში. აქედან უკრაინის საჰაერო თავდაცვამ 90 დრონის განადგურება მოახერხა, 71-მა კი მიზანს ვერ მიაღწია და ლოკაციურად დაიკარგა.
ამასთან დაკავშირებით ინფორმაციას უკრაინის შეიარაღებული ძალები Telegram-ზე ავრცელებენ.
"დადასტურებულია 90 Shahed-ის ტიპის დამრტყმელი უპილოტო საფრენი აპარატებისა და სხვა ტიპის დრონების ჩამოგდება ხარკოვის, პოლტავის, სუმის, კიევის, ჩერნიგოვის, ჩერკასის, ვინიცის, ხმელნიცკის, კიროვოგრადის, მიკოლაევისა და ოდესის ოლქებში" - ნათქვამია უკრაინის შეიარაღებული ძალების განცხადებაში.
რუსეთის თავდასხმის შედეგად დაზარალდა კიევის, ჩერნიგოვისა და სუმის ოლქები.
რუსული დრონები ორიოლის, ბრიანსკის, მილეროვოს, შატალოვოს და პრიმორსკო-ახტარსკის რეგიონებიდან იყო გაშვებული.
