EU მოლდოვას ბლოკში ინტეგრაციისთვის მოსამზადებლად €1.9 მილიარდის დახმარებას გადასცემს

ევროკავშირი მოლდოვას დაახლოებით 1.9 მილიარდი ევროს ღირებულების ფინანსურ დახმარებას გადასცემს, რომლისგანაც 385 მილიონი ევრო გრანტის სახით გაიცემა, ხოლო 1.5 მილიარდი ევრო სესხის სახით. 

როგორც ოფიციალურ რელიზშია აღნიშნული, ევროპულმა კომისიამ და ევროპულმა პარლამენტმა 19 თებერვალს შეთანხმებას მიაღწია მოლდოვის რეფორმისა და ზრდის მექანიზმის ჩამოყალიბებაზე (Reform and Growth Facility for Moldova). 

მოლდოვის განვითარებისთვის განკუთვნილი დახმარების შესახებ ევროპული კომისია წინადადებით გასული წლის ოქტომბერში გამოვიდა.

ევროკომისიის ცნობით, ამ გეგმის ფარგლებში მოლდოვა დამოუკიდებლობის გამოცხადების შემდეგ ევროკავშირის ყველაზე მსხვილ ფინანსური დახმარების პაკეტს მიიღებს. 

"[დახმარება] გააძლიერებს მოლდოვის ეკონომიკას, უზრუნველყოფს მნიშვნელოვან ფინანსურ მხარდაჭერას და ქვეყანას, რეფორმების დაჩქარების გზით, კიდევ უფრო ახლოს მიიყვანს ევროკავშირის წევრობასთან". - წერია ევროკომისიის პრესრელიზში. 

მოლდოვისთვის გამოყოფილი 1.9 მილიარდი ევრო ევროკავშირში მოლდოვის გაწევრიანებისთვის აუცილებელ სოციო-ეკონომიკური და ფუნდამენტური რეფორმების გატარებასა და პრიორიტეტულ საინვესტიციო საჭიროებებს მოხმარდება. 

"ის დაფარავს ყველა იმ კრიტიკულ სექტორს, რომლებიც მოლდოვის ეკონომიკურ ზრდასა და ევროკავშირის საერთო ბაზარში ინტეგრაციას შეუწყობენ ხელს". - აცხადებს ევროკომისია. 

დაფინანსება წელიწადში 2-ჯერ, მოლდოვის მთავრობის მოთხოვნისა და ევროკომისიის ავტორიზაციის საფუძველზე გაიცემა. 

ევროკავშირის აღმასრულებელი ორგანოს პრესრელიზში ასევე აღნიშნულია, რომ ფინანსური პაკეტი მიზნად ისახავს მოლდოვის ენერგობაზრის მდგრადობისთვის ხელშეწყობასა და საბოლოოდ, მოლდოვის დახმარებას, 2026 წლის ბოლომდე, სრულად გამოეთიშოს რუსეთის ენერგოწყაროებს.