დღეს, 5 ოქტომბერს ევროპარლამენტმა მიიღო რეზოლუცია, რომელიც ევროკავშირის ქვეყნებს მოუწოდებს მოლდოვის ევროკავშირში გაწევრიანებაზე მოლაპარაკებები 2023 წელსვე დაიწყონ.
ევროპარლამენტის დღევანდელი სესიის შემდეგ გამოქვეყნებულ პრესრელიზში, ევროპარლამენტარებმა აღნიშნეს, რომ მოლდოვას EU-ში გაწევრიანება წარმოადგენს გეოსტრატეგიულ ინვესტიციას ერთიანი და ძლიერი ევროპისთვის.
ამასთანავე,რეზოლუციის მიხედვით, ევროპარლამენტარები მოლდოვის მიმართ ფინანსური და ტექნიკური დახმარების გაგრძელებას მოითხოვენ, რათა დაჩქარდეს მოლდოვის EU-ში გაწევრიანების პროცესი.
რეზოლუციაში ნათქვამია, რომ მოლდოვას ამჟამინდელმა პროდასავლურმა მთავრობამ “აჩვენა თავისი მონდომება და უნარი შეასრულოს ევროკომისიის მოთხოვნები გაწევრიანების საკითხზე მოლაპარაკებების დასაწყებად”.
შეგახსენებთ, რომ მოლდოვამ EU-ში გაწევრიანებაზე განაცხადი 2022 წლის მარტში შეიტანა, ხოლო რამდენიმე თვის შემდეგ, 2022 წლის ივნისში უკრაინასთან ერთად კანდიდატის სტატუსი მიიღო.
