რუსეთის ფედერალური საბჭოს თავმჯდომარის მოადგილე, კონსტანტინ კოსაჩევი ოკუპირებულ აფხაზეთში განვითარებულ მოვლენებს გამოეხმაურა. კოსაჩევის კომენტარს რუსული სამთავრობო-პროპაგანდისტული გამოცემა TACC ავრცელებს.
"ჩვენ აფხაზეთში განვითარებულ მოვლენებს ახლოდან ვაკვირდებით, ვინაიდან აფხაზეთი ახლო და მეგობრული მეზობელი ქვეყანაა. მხოლოდ ერთი რამ შემიძლია ვთქვა: რუსეთს არასდროს და არსად დაუჭერია მხარი სახელმწიფო გადატრიალების მცდელობებისთვის. ჩვენ აუცილებლად და ყოველთვის ვიდგებით კონსტიტუციური პრინციპებისა და კანონის მხარეს". - თქვა კოსაჩევმა.
ფედერალური საბჭოს ვიცესპიკერმა ასევე აღნიშნა, რომ ოკუპირებული აფხაზეთის ე.წ. ხელისუფლებასა და ოპოზიციას შორის არსებულ უთანხმოებაზე ნებისმიერი დავა ან დისკუსია ცალკეულ საკანონმდებლო აქტებთან დაკავშირებით, ამ შემთხვევაში რუსეთთან ხელშეკრულების რატიფიცირებაზე, "დასაშვებია".
"თუმცა ეს ძალადობრივ სცენარში არ უნდა გადაიზარდოს, ქუჩაში არ უნდა განხორციელდეს და მით უმეტეს, ურთიერთობების დალაგება და წინააღმდეგობების მოგვარება არაკონსტიტუციური გზებით არ უნდა მოხდეს". - დაამატა კოსაჩევმა.
ფედერალური საბჭოს ვიცესპიკერის თქმით, რუსეთი აფხაზ ხალხს ამჟამინდელი დაპირისპირებების მოგვარებას "კონსტიტუციის დარღვევისა და უწყებებისა და ძალოვანი სტრუქტურების ჩამოშლის" გარეშე "გულწრფელად უსურვებს".
15 ნოემბერს, სოხუმში მომიტინგეები თვითგამოცხადებული რესპუბლიკის პარლამენტის შენობის ეზოში შეიჭრნენ და შენობას ალყა შემოარტყეს.
ადგილობრივი მედიის ინფორმაციით, მომიტინგეების ეზოში შეჭრამდე ცოტა ხნით ადრე შენობა დატოვა თვითგამოცხადებულმა რესპუბლიკის ე.წ. პრეზიდენტმა ასლან ბჟანიამ.
აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი.
აქციის მონაწილეები ბჟანიას გადადგომას ითხოვენ.
ოკუპირებული აფხაზეთის მარიონეტული რეჟიმის პრეზიდენტმა, ასლან ბჟანიამ ამავე დღეს დე ფაქტო ოპოზიციის პროტესტის ფონზე თავის მხარდამჭერებს მიმართა და თქვა, რომ ე.წ. "მთავრობის წევრები რჩებიან აფხაზეთში, დარჩებიან ადგილზე და გააგრძელებენ მუშაობას".
შეგახსენებთ, რომ, გავრცელებული ცნობებით, ოკუპირებული აფხაზეთის მარიონეტული რეჟიმის დე ფაქტო ოპოზიციის მიერ შექმნილი საკოორდინაციო საბჭო და ე.წ. მთავრობა მარიონეტი პრეზიდენტის, ასლან ბჟანიას გადადგომის საკითხზე მოლაპარაკებებს აწარმოებდნენ.
ცოტა ხნის წინ კი, ოკუპირებული აფხაზეთის დე ფაქტო ოპოზიციამ განაცხადა, რომ მარიონეტული რეჟიმის პრეზიდენტი ასლან ბჟანია გაიქცა, რის გამოც ე.წ. ოპოზიციასა და ე.წ. მთავრობას შორის მოლაპარაკებები შეჩერდა. დე ფაქტო ოპოზიცია ვარაუდობდა, რომ ბჟანია ბამბორას რუსულ ნაწილში იმყოფებოდა.
11 ნოემბერს ე.წ. ოპოზიციის ლიდერები დააკავეს, მარიონეტული რეჟიმი აცხადებდა, რომ "მათ ჩაიდინეს კანონსაწინააღმდეგო ქმედებები პარლამენტის ერთ-ერთი დეპუტატის მიმართ". საუბარია, ალმას აქაბაზე.
ოპოზიციონერების დაკავებას სოხუმში საპროტესტო აქციები მოჰყვა, მომიტინგეებმა ჩაკეტეს სოხუმისკენ მიმავალი სამივე ხიდი – კოდორის, გუმისთისა და ქვემო გუმისთის ხიდები. დაკავებულების გათავისუფლების შემდეგ კი მომიტინგეებმა გუმისთის ხიდი გახსნეს, რომელზეც ოკუპირებული რეგიონის ცენტრალური გზატკეცილი გადის.
საპროტესტო აქციების ფონზე აფხაზეთის თვითგამოცხადებულმა ხელისუფლებამ ოპოზიციის წარმომადგენლები გაათავისუფლა.
ოკუპირებული აფხაზეთის ოპოზიციური პარტიის, სახალხო ერთობის ფორუმის ერთ-ერთი ლიდერის, ასლან ბარციცის თქმით, დაკავების დროს მისი კოლეგები გუდაუთიდან ბრუნდებოდნენ, სადაც მოქალაქეებს შეხვდნენ და რუსეთსა და აფხაზეთს შორის ხელმოწერილი შეთანხმებაზე ისაუბრეს.
აფხაზური ოპოზიცია რუსულ-აფხაზური საინვესტიციო ხელშეკრულების რატიფიცირებას ეწინააღმდეგება და განხილვის პარალელურად, 15 ნოემბერს დე ფაქტო პარლამენტთან საპროტესტო აქციის გამართვას გეგმავდა.
"რუსეთის იურიდიული პირების მიერ აფხაზეთის რესპუბლიკის ტერიტორიაზე საინვესტიციო პროექტების განხორციელებასთან" დაკავშირებული კანონის მიზანი მარიონეტული რეჟიმის განმარტებით, "საინვესტიციო პროექტების მხარდაჭერა, ეკონომიკის შემდგომი განვითარება და მოქალაქეების მდგომარეობის გაუმჯობესებაა".
ოპოზიციის წარმომადგენლები კი ხაზს უსვამენ, რომ კანონპროექტი რუს ინვესტორებს პრივილეგიებს აძლევს, მათ შორის, განსაზღვრული დროით ათავისუფლებს დღგ-სგან, აძლევს ე.წ. საბაჟო გადასახადის გარეშე მუშაობის საშუალებას და ითვალისწინებს, ოკუპირებულ რეგიონში რუსული ბანკის გახსნას, რომლითაც საინვესტიციო თანხები იმოძრავებს.
ამასთან, კანონპროექტის მიღების წინ დე ფაქტო პარლამენტმა "მრავალფუნქციური კომპლექსების სამართლებრივი სტატუსის მოწესრიგების შესახებ" მომზადებული საკანონმდებლო ინიციატივა ორი მოსმენით უკვე მიიღო. ოპოზიციის წარმომადგენლების შეფასებით, მარიონეტული რეჟიმი ცდილობს "მრავალფუნქციური ცენტრების მშენებლობის" შესახებ ჩანაწერით, დააკანონოს ივლისში გაწვეული "აპარტამენტების კანონი", რომელიც, მათ შორის, რუსეთის მოქალაქეებისთვის უძრავი ქონების მიყიდვის უფლებას მოიცავდა.
