NATO-ს გენერალური მდივნის, მარკ რუტეს თქმით, ჩრდილოკორეელი ჯარისკაცები რუსეთის დასახმარებლად უკვე კურსკის რეგიონში არიან განლაგებული.
რუტემ აღნიშნა, რომ რუსეთ-უკრაინის ომში ჩრდილოკორეელების ჩართვა კონფლიქტის სერიოზულ ესკალაციას წარმოადგენს.
გასულ კვირას, რუსეთის პრეზიდენტმა, ვლადიმირ პუტინმა პირდაპირ არ გასცა პასუხი კითხვას, იმყოფებიან თუ არა ჩრდილოკორეელი ჯარისკაცები რუსეთ-უკრაინის ომში.
"ეს ჩვენი სუვერენული გადაწყვეტილებაა. გამოვიყენებთ თუ არა, ან სად, ან როგორ, ან ჩავერთვებით თუ არა წვრთნებსა ან გამოცდილების გაცვლაში, ეს ჩვენი გადასაწყვეტია" – თქვა პუტინმა.
რუტემ ასევე დაამატა, რომ ბალისტიკური რაკეტებისა და ჯარისკაცების სანაცვლოდ, ჩრდილოეთ კორეა რუსეთისგან სამხედრო ტექნოლოგიებსა და სხვა ტიპის დახმარებას მიიღებს, რაც მას საერთაშორისო სანქციებისგან თავის ასარიდებლად სჭირდება.
