2024 წლის ნობელის პრემიის მფლობელი ლიტერატურის დარგში სამხრეთ კორეელი მწერალი ჰან განი გახდა.
"2024 წლის ნობელის პრემია ლიტერატურის დარგში სამხრეთ კორეელ ავტორს, ჰან განს გადაეცა მისი ექსპრესიული პოეტური პროზისთვის, რომელიც თვალს უსწორებს ისტორიულ ტრავმებს და ააშკარავებს ადამიანური ცხოვრების სიმყიფეს". - წერია ნობელის პრემიის რელიზში.
53 წლის ჰან განი პირველი აზიელი ქალია, რომელმაც ლიტერატურის დარგში ნობელის პრემია მიიღო.
ნობელის პრემია ლიტერატურის დარგში 1901 წლიდან გაიცემა. სხვადასხვა დროს ერთ-ერთი ყველაზე პრესტიჟული ჯილდოს მფლობელები გახდნენ პაბლო ნერუდა, გაბრიელ გარსია მარკესი, იოსიფ ბროდსკი, ერნესტ ჰემინგუეი და სხვები.
