ბერლინის ზოოპარკში, პანდა მენგ-მენგი კვლავ ტყუპებზეა ორსულად - ამის შესახებ ინფორმაციას გერმანული გამოცემა, Deutsche Welle ავრცელებს.
გამოცემის ცნობით, მენგ-მენგი და ხვადი პანდა, ჯაო ცინგი ბერლინის ზოოპარკს ჩინეთის მთავრობამ 2017 წელს აჩუქა, ხოლო მენგ-მენგს პირველი ტყუპი (პიტი და პოლი) 2019 წელს შეეძინა.
ბერლინის ზოოპარკის თქმით, მენგ-მენგი ამჯერად ხელოვნური განაყოფიერების შედეგად ელოდება ტყუპებს.
"ულტრაბგერითმა გამოკვლევამ ორი გულისცემა დააფიქსირა.
პანდის ბელები, ამ დროისთვის 2.5 სანტიმეტრის სიგრძის არიან და ჯერ კიდევ დიდი დრო აქვთ გასაზრდელად". - წერს გამოცემა.
ბერლინის ზოოპარკი ტყუპების დაბადებას აგვისტოს დასასრულს ელოდება.
