ო'ბრაიენი: მოვუწოდებთ საქართველოს მთავრობას, არ დახუროს საქართველოს ევროპული მომავლის კარი

აშშ-ს სახელმწიფო მდივნის თანაშემწე ევროპისა და ევრაზიის საკითხებში, ჯიმ ო'ბრაიენი საქართველოში მიმდინარე პოლიტიკურ პროცესებს გამოეხმაურა და საკუთარ X-ის გვერდზე მოუწოდა საქართველოს მთავრობას, არ დახუროს საქართველოს ევროპული მომავლის კარი. 

X-ზე ჯიმ ო'ბრაიენმა ჯოზეფ ბორელის ინტერვიუ გააზიარა, სადაც ის საქართველოს ევროპულ პერსპექტივაზე და მთავრობის წინააღმდეგ მიღებულ შესაძლო შემზღუდველ ზომებზე საუბრობს. ო'ბრაიენმა ასევე დაწერა, რომ 32 წლის მანძილზე აშშ საქართველოს მთავრობას მილიარდობით დოლარით დაეხმარა, მათ შორის საქართველოს თავდაცვის ძალების გაძლიერების, შეიარაღების და გაწვრთნის და დემოკრატიული ინსტიტუციების გაძლიერების მიმართულებით.