კობახიძე: სამწუხაროა, როდესაც გერმანიის ელჩად წოდებული ადამიანი არ იშლის სპეკულაციებს

ძალიან სამწუხაროა, როდესაც გერმანიის ელჩად წოდებული ადამიანი არ იშლის სპეკულაციებს და ყველას გახსოვთ, რომ ის ჩართული იყო ლელოს საარჩევნო აქტივობაში. ბოლნისში იყვნენ ერთად წასული, სადაც ერთად მონაწილეობდნენ კონკრეტულ საარჩევნო ღონისძიებაში. გერმანიის ელჩი, რომელიც ამ საპატიო წოდებას ატარებს, გრიგოლ გეგელიას დონემდეა დასული. ეს ძალიან სამწუხაროა, ის სპეკულირებს და მერე ნახეთ, რომ კონკრეტულმა ტელევიზიებმა ელჩის ეს ტვიტი თუ რაც იყო, გამოიყენეს დეზინფორმაციის გავრცელებისთვის და წარმოაჩინეს ისე, თითქოს გერმანიის კანცლერი საუბრობდა საქართველოში არსებულ ვითარებაზე, როდესაც ის საუბრობდა ხუთი წლის წინანდელ მკვლელობაზე, რომელიც გერმანიაში იქნა ჩადენილი. სამწუხაროა, როდესაც ჯერ გერმანიის ელჩი აძლევს დეზინფორმაციის წყაროს კონკრეტულ მედიასაშუალებებს და მერე ისინი იტაცებენ. ეს სამწუხარო მოვლენაა, თუმცა ეს არ არის ჩვენი, არამედ გერმანული სახელმწიფოს პრობლემაა, როდესაც მისი ელჩი და ოფიციალური წარმომადგენელი ასეთი არასერიოზული ქმედებებით გამოირჩევა.