50-წლიანი პაუზის შემდეგ აშშ-ს კოსმოსური აპარატი მთვარეზე დაჯდა. ინფორმაციას აერონავტიკისა და კოსმოსური სივრცის კვლევის ეროვნული სამმართველო (NASA) სოციალურ ქსელ X-ში ავრცელებს.
"თქვენი შეკვეთა მიტანილია... მთვარეზე"! – წერია NASA-ს პოსტში.
IM-1 მოდელის კოსმოსური აპარატის სახელია ოდისევსი (Odysseus), რომელიც კომპანია Intuitive Machines-ს ეკუთვნის.
ოდისევსი 15 თებერვალს კოსმოსში SpaceX-ის რაკეტა Falcon-ის დახმარებით გაუშვეს. მთვარის ზედაპირამდე მისაღწევად საფრენ აპარატს 8 დღე დასჭირდა.
ოდისევსი 1972 წლის შემდეგ პირველი ამერიკული საფრენი აპარატია, რომელიც მთვარის ზედაპირზე დაჯდა. უკანასკნელად ეს მისია აპოლო-17-მა შეასრულა, ხომალდის ბორტზე ასტრონავტებიც იმყოფებოდნენ.
"დღეს, ნახევარი საუკუნის შემდეგ ამერიკა მთვარეზე დაბრუნდა". – თქვა NASA-ს ხელმძღვანელმა ბილ ნელსონმა.