უკრაინის მხარეს მებრძოლი ლეგიონი რუსეთის თავისუფლება ტელეგრამ-არხზე ბელგოროდში ჩატარებულ ოპერაციაზე ახალ ცნობას აქვეყნებს და აღნიშნავს, რომ ლეგიონმა რუსეთის ტერიტორიაზე შეტევითი ოპერაცია დაასრულა.
"ბელგოროდის ოლქში დაახლოებით ერთი დღე გავატარეთ, შეგვიძლია თამამად ვთქვათ: დაკისრებული ამოცანები შესრულებულია, ყველა ლეგიონერი ჯანმრთელია. მტერმა ცოცხალი ძალისა და ტექნიკის დანაკარგი განიცადა". - ნათქვამია ლეგიონის განცხადებაში.
ტელეგრამ-არხზე გამოქვეყნებულ ინფორმაციაში ასევე ნათქვამია, რომ ლეგიონის მხრიდან რუსეთის ფედერაციის ტერიტორიაზე რეიდები "პუტინის ძაღლებისთვის ახალ რეალობას" წარმოადგენს.
"ჩვენ არ გავჩერდებით: იმიტომ, რომ რუსეთი ჩვენი სახლია და ვიბრძოლებთ სანამ არ გავათავისუფლებთ.
რუსეთისთვის! თავისუფლებისთვის!". - აღნიშნულია ლეგიონი რუსეთის თავისუფლების განცხადებაში.
აქამდე, უკრაინის მხარეს მებრძოლი ლეგიონი რუსეთის თავისუფლება ტელეგრამ-არხზე წერდა, რომ რუსეთის ტერიტორიაზე, უკრაინის მოსაზღვრე ბელგოროდის ოლქზე იერიშები მიაქვთ.
"ჩვენ ვაგრძელებთ ჩვენი სახლის გაწმენდას პუტინის სიბილწისგან". - აღნიშნულია ლეგიონის ტელეგრამ-არხზე გავრცელებულ ინფორმაციაში.
შეგახსენებთ, რომ აქამდე, რუსულმა მოხალისეთა კორპუსმა და ლეგიონმა რუსეთის თავისუფლება, რომლებიც უკრაინის შეიარაღებული ძალების მხარეს იბრძვიან, ბელგოროდისა და ბრიანსკის ოლქებში რამდენიმე რეიდი მოაწყვეს. 31 აგვისტოს РДК-მ განაცხადა, რომ კურსკის ოლქში სამხედრო აეროდრომს თავს დრონებით დაესხა.
ამასთან, უფრო ადრე, 22 მაისს რუსულმა მოხალისეთა კორპუსმა (РДК) და ლეგიონმა რუსეთის თავისუფლებამ ბელგოროდის ოლქის რამდენიმე დასახლების რუსეთისგან "განთავისუფლების" შესახებ განცხადება გააკეთეს.