ერთიანი ნაციონალური მოძრაობის ყოფილი დეპუტატის, ხატია დეკანოიძის თქმით, მას მოლოდინი ჰქონდა, რომ ენმ-ს თავმჯდომარის არჩევამდე პერიოდში ელენე ხოშტარიას და ზურა ჯაფარიძეს "უფრო მკვეთრი" პოზიცია ექნებოდათ. დეკანოიძემ TV პირველის ეთერში აღნიშნა, რომ ხოშტარია და ჯაფარიძე "რაღაცნაირად ამ პროცესების მიღმა დარჩნენ". მან იმავე გადაცემაში კიდევ ერთხელ თქვა, რომ ლევან ხაბეიშვილის თავმჯდომარედ არჩევა დავით კეზერაშვილის და ვანო მერაბიშვილის ინტერესი იყო.
"ძალიან სამწუხაროა, რომ ელენე ხოშტარია, რომელსაც მე ძალიან დიდ პატივს ვცემ და ზურა ჯაფარიძე, რომელსაც ასევე პატივს ვცემ, მაშინ რაღაცნაირად ამ პროცესების მიღმა დარჩნენ, იმიტომ, რომ ყველას გვქონდა ჩვენი პოზიცია...
... ყოველდღე, როცა რაღაც პოლიტიკურ კომენტარს ვაკეთებთ, გვიწევს ნაციონალურ მოძრაობაზე საუბარი, დღეს, მაგალითად ანი წითლიძეზე მეკითხებოდნენ, ყოველ შემთხვევაში, გვიწევს რაღაც მსჯელობა პოლიტიკოსებს, რადგან პოლიტიკა არის ზედაპირზე, საჯარო სფეროა" - თქვა დეკანოიძემ.
წამყვანის კითხვაზე, "თქვენი პრეტენზია ეხება იმას, რომ ელენე ხოშტარიამ და ზურა ჯაფარიძემ ნაცმოძრაობაში მიმდინარე ამბებზე მკვეთრი პოზიციონირებისგან თავი შეიკავეს?", ენმ-ის ყოფილი დეპუტატი პასუხობს, რომ პრეტენზია არ აქვს.
"მე ჩემი არჩევანი გავაკეთე ყველაფერთან დაკავშირებით და დავტოვე პრაქტიკულად ჩემი სახლი, და პარტია, როდესაც რავიცი, მართლაც მიშა ციხეში იყო, იმიტომ, რომ ეს არჩევანი ეხებოდა სწორედ იმას, რა ძალიან დიდ ნაწილსაც ამ პარტიის პოლიტიკის არ ვეთანხმებოდი - მენეჯმენტის და ზოგადად თავმჯდომარის არჩევას, და ა.შ.
არა, პრეტენზია ნამდვილად არ მაქვს, იმიტომ, რომ მათი პოზიცია მათი პოზიციაა, უბრალოდ, იმ ადამიანებისგან გაცილებით მეტს მოველოდი, ვისაც პატივს ვცემ და პოლიტიკურ სივრცეში, მგონია, რომ ეს ადამიანები რაღაცნაირად უფრო ჩართულები უნდა ყოფილიყვნენ. მეც და ბევრი ადამიანი ნაციონალურ მიძრაობაში რაღაცნაირად პარტნიორად აღვიქვამდით ამ ადამიანებს.
[რატომ არ გააკეთეს მკაფიო განმარტება], არ ვიცი, ვერ გეტყვით. მახსოვს, ზურას განმარტება იყო ერთი, როდესაც თქვა, კარგია, არჩევნები იქნება, რომ ვინმეს დაველაპარაკო პარტიაშიო... მართლა მივიჩნევდი, რომ უფრო სხვანაირ შეფასებებს ველოდებოდი. გაცილებით სხვა მოლოდინი მქონდა, უფრო რაღაცა მკვეთრი შეფასების, მაგრამ ეს არის მათი საქმე, მათი პოლიტიკური გადაწყვეტილება" - თქვა დეკანოიძემ.
ენმ-ის ყოფილი წევრის განცხადებაზე TV პირველმა კითხვა ელენე ხოშტარიას და ზურა ჯაფარიძესაც დაუსვა. დროას ლიდერის თქმით, მათ პოზიციაში "არაფერი არამკაფიო" არ იყო.
"რომ ჩამეთვალა, რომ რაღაცა სხვანაირად უნდა მექნა, სხვანაირად ვიზამდი, ცოტა ვერ მივხვდი, რა იგულისხმა. იყო პერიოდი, სადაც ჩვენ ერთობაზე და ანტიბიძინა კამპანიაზე ძალიან ბევრს ვმუშაობდით და არათუ კატეგორიულად წინააღმდეგი ვარ იმ პროცესის, შიდაპარტიულ რაღაცებზე ლაპარაკის, ვინმეზე ფსონის დადების, არამედ, მგონია, რომ ძალიან ცოდავს ქართული ოპოზიცია, შეიძლება, საგნობრივად იკამათო, მაგრამ ძალიან ცოდავს, როცა პერსონალური ბრძოლები არის გადმოტანილი სხვა პარტიებიდან" - ამბობს ხოშტარია.
ზურა ჯაფარიძის თქმით კი, ნაციონალური მოძრაობა მისი კონკურენტია და თავის პრობლემებს თავად უნდა მიხედოს.
"კითხვა რა არის? რატომ არ ვიყვირე, რომ ნაციონალურ მოძრაობაში ძალაუფლებას ხელში იგდებდნენ კეზერაშვილი და მერაბიშვილი? ეს არის კითხვა - რატომ არ ვიყვირე ამაზე?
სხვა პარტიების შიდა ამბებზე მე ზოგადად ნაკლებად ვაკეთებ კომენტარებს, მაგრამ თუ კითხვა ეგ არის, რატომ არ ვიყვირე, რომ ნაციონალური მოძრაობის შიგნით რაღაც ძალაუფლებას ხელში იგდებენ მერაბიშვილი-კეზერაშვილი, ჯერ ერთი, მერაბიშვილზე მაქვს კომენტარი გაკეთებული, მაგრამ რატომ უნდა მეყვირა, ვერ გავიგე? თუ ფიქრობს, რომ ეს პრობლემაა ნაციონალური მოძრაობისთვის და აზარალებს ნაციონალურ მოძრაობას, მე რა, ნაციონალური მოძრაობის გულშემატკივარი ვარ? ჩემი პარტია მაქვს, ნაციონალური მოძრაობა ჩემი კონკურენტია, საერთოდ არ ვარ მათი მხარდამჭერი, ეს რომ მდომოდა, დავრჩებოდი ნაციონალურ მოძრაობაში 2015 წელს, სხვაგან ვარ, სხვა რაღაცას ვაკეთებ, ჩემი კონკურენტები არიან, თვითონ მიხედონ თავიანთ პრობლემებს" - თქვა გირჩი-მეტი თავისუფლების ლიდერმა.
ხატია დეკანოიძემ ერთიანი ნაციონალური მოძრაობის დატოვების გადაწყვეტილება 23 მარტს გაასაჯაროვა. მიზეზებზე საუბრისას, დეკანოიძემ რამდენიმე მიზეზი დაასახელა. მათ შორის, პარლამენტის ბოიკოტის საკითხი. გარდა ამისა, დეკანოიძის შეფასებით, ენმ-ში ჩატარებული პოლიტსაბჭოს არჩევნების პროცესი არ იყო გამჭვირვალე და ეს მისთვის მორალურად მძიმე იყო. ასევე, მისი თქმით, ერთ-ერთი მნიშვნელოვანი საკითხი იყო ვანო მერაბიშვილი და მისი ჩრდილოვანი გავლენა, რომელიც დეკანოიძის შეფასებით "ძველი პარადიგმაა და არ იმუშავებს".
"ერთ-ერთი ჩემთვის მნიშვნელოვანი თემა იყო მერაბიშვილის გააქტიურება. მე არ ვარ ჩართული პარტიის მენეჯმენტში, მაგრამ ჩანს რომ [მერაბიშვილი] ერევა. ვანო მერაბიშვილის განცხადებები, რომელიც შარავანდედივით წამოადგა ამ პარტიას, ეს არის სრულიად ძველი პარადიგმა. ძველი პარადიგმით ეს პარტია ვერ იმოქმედებს. ერეოდა თავმჯდომარის არჩევნებში, რა თქმა უნდა. საწყენი იყო მისი განცხადება უკრაინასთან მიმართებაშიც. [...] ვერ აუკრძალავ ვერავის სიტყვის თავისუფლებას, მაგრამ თუ მერაბიშვილს სურს საჯარო პოლიტიკაში მოსვლა, მაშინ უნდა გაბედოს და მოვიდეს. თუ ეს შორიდან საუბარი არის მისი ჩრდილოვანი გავლენა, ეს არის ძველი პარადიგმა, რაც არ იმუშავებს". - თქვა დეკანოიძემ.
