ჩაჩიბაია: ჩემი პირადი სურვილი და თხოვნაა, რომ მანდატი და პარლამენტი დავტოვო

ჩემი პირადი სურვილი არის, რომ მანდატი დავტოვო. ჩემი დაჟინებული თხოვნაა, რომ პარლამენტი დავტოვო. ჩემი პირადი და დაჟინებული თხოვნაა, რომ ეს საკითხი დადებითად გადაწყდეს [...] ვფიქრობ, რომ საპარლამენტო ცხოვრებისთვის მე მზად არ აღმოვჩნდი. იცით, რომ 30 წელი ჯარში ვიყავი. ჩემი პირადი სურვილი არის, რომ პარლამენტიდან გამოვიდე და ვნახოთ. მაგრამ, ამავდროულად, მე ვრჩები ჩვენი პარტიის ერთგული წევრი [...] მანდატის დატოვების სურვილი იმიტომ მაქვს, რომ ვფიქრობ, ალბათ, საჯარო ან ნებისმიერ სხვა სამსახურში უფრო მეტად მოვახდენ ჩემი თავის რეალიზებას, ვიდრე, დავუშვათ, საპარლამენტო ცხოვრებაში [...] მანდატს დავტოვებ და ალბათ გამოვალ პარლამენტიდან, თუმცა, საბოლოოდ მაინც პარტიის ხელმძღვანელობასთან გავისაუბრებ [...] ამ საკითხზე კომუნიკაცია უკვე მქონდა და ჩემი პოზიცია ფაქტობრივად ყველამ იცის. თუმცა, ვნახოთ. რაღაც არის, რაც დავუშვათ დამატებით განხილვას საჭიროებს [...] რა თქმა უნდა, ჩემი ნეიტრალური პოზიცია, რაც [პარლამენტში რუსული კანონის კენჭისყრაზე] დავაფიქსირე, გარკვეულ ახსნას ეფუძნებოდა. ვფიქრობ, არის გარკვეული საკითხები, რომელიც შიდაპარტიულ განხილვას საჭიროებს, ვიდრე ასე საზოგადოდ მსჯელობას. ამას ჩემთვის დავიტოვებ, რადგან არის საკითხები, რომელიც ეხება ამ დოკუმენტის არა მხოლოდ შინაარს, არამედ, დროის საკითხსაც.