რუსეთის ფედერაციის უშიშროების საბჭოს თავმჯდომარის მოადგილის, დმიტრი მედვედევის თქმით, ომის წაგების შემთხვევაში რუსეთს დაშლიან და ის არსებობას შეწყვეტს. ამის შესახებ მედვედევი Telegram-ის პირად არხზე წერს.
"ყველა გონივრული ძალისთვის ცხადია, რომ თუ აშშ-ს რუსეთის დამარცხება სურს, მაშინ ჩვენ მსოფლიო კონფლიქტის ზღვარზე ვართ. თუ აშშ-ს რუსეთის დამარცხება სურს, მაშინ ჩვენ გვაქვს უფლება, დავიცვათ საკუთარი თავი ნებისმიერი იარაღით, მათ შორის, ბირთვული იარაღით. თუ რუსეთი სპეციალურ სამხედრო ოპერაციას შეაჩერებს და გამარჯვებას ვერ მიაღწევს – რუსეთი აღარ იქნება, მას ნაწილებად დაშლიან. თუ აშშ კიევის რეჟიმისთვის იარაღის მიწოდებას შეწყვეტს, ომი დასრულდება". - წერს მედვედევი.
ამასთან, მედვედევმა ბაიდენის სიტყვებს, რომ აშშ-ს რუსეთთან ომის განზრახვა არ აქვს და თავდასხმას არ აპირებს "არაგულწრფელი და უმნიშვნელო" უწოდა. გარდა ამისა, ბაიდენზე საუბრისას, მედვედევმა გამოიყენა ფრაზები – "სიბერით გამოწვეული დემენცია" და "უცნაური და დაბნეული მოხუცი კაცი, რომელიც პოლონეთიდან საუბრობს".
მედვედევმა კიდევ ერთხელ გაიმეორა, რომ აშშ არის "მტრული სახელმწიფო, რომელიც რუსეთის მიმართ სიძულვილს ასხივებს".
