უკრაინის პრეზიდენტი ვოლოდიმირ ზელენსკი აშშ-ში, ვაშინგტონში ჩავიდა.
"მე დღეს ვარ ვაშინგტონში, რათა ამერიკელ ხალხს, პრეზიდენტსა და კონგრესს მათი ძალიან საჭირო მხარდაჭერისთვის მადლობა ვუთხრა და ასევე გავაგრძელო თანამშრომლობა, რათა ჩვენი გამარჯვება უფრო მოახლოვდეს". – თქვა ზელენსკიმ ვაშინგტონში.
ზელენსკის თქმით, ის უკრაინის თავდაცვის შესაძლებლობების გასაუმჯობესებლად მოლაპარაკებებს გამართავს.
"გავმართავ მოლაპარაკებების სერიებს, რათა გავაძლიეროთ უკრაინის გამძლეობა და თავდაცვის შესაძლებლობები. კერძოდ, აშშ-ს პრეზიდენტ ჯოზეფ ბაიდენთან უკრაინისა და აშშ-ს ორმხრივ თანამშრომლობას განვიხილავთ". – თქვა ზელენსკიმ.
"მომავალ წელს მთელ ჩვენს მიწას, ჩვენს ხალხს უკრაინული დროშა და თავისუფლება უნდა დავუბრუნოთ". – დაამატა უკრაინის პრეზიდენტმა.
უკრაინაში ომის დაწყების შემდეგ ეს ვოლოდიმირ ზელენსკის პირველი ვიზიტია, რომელსაც ქვეყნის საზღვრებს გარეთ მართავს. ზელენსკი პრეზიდენტ ბაიდენს შეხვდება, შემდეგ კი აშშ-ს კონგრესის წინაშე წარდგება.
